Të gjithë ata që janë pushuar nga puna dhe për të cilët gjykata ka urdhëruar kthimin në detyrë pranë institucioneve shtetërore, por vendimi nuk është zbatuar kanë të drejtë të kërkojnë hetime.
Të paktën kjo kuptohet nga dërgimi në gjyq i ish kryebashkiakut të Shkodrës Bardh Spahia, kundër të cilit akuza e “pengimit të ekzekutimit të vendimeve të gjykatës” u aprovua në seancën paraprake. Kjo do të thotë se veprimet e SPAK u certifikuan nga gjykata antikorrupsion duke e dërguar ish funksionarin të pandehur, sipas një hetimi të çelur nga kallëzimi i Mark Mollës, ish drejtor i ujësjellësit i shkarkuar nga detyra dhe që fitoi në gjykatën lokale të drejtën e kthimit në detyrë, që nuk u zbatua nga ish kryebashkiaku
Ish kryebashkiaku kërkoi në seancën paraprake pushimin e çështjes pasi fakti nuk ekziston, ndërkohë që në Gjykatën Antikorrupsion procesi në themel do të mbahet me procedurë të zakonshme. Kjo është hera e parë kur ndaj një ish zyrtari ngrihet akuzë sepse nuk ka zbatuar vendimin e gjykatës për marrëdhëniet e punës.
Gjatë podcastit ‘Fol me Anila Hoxhën’ transmetuar në TOP ALBANIA Radio të titulluar ‘Administrata paralele” ministria e financave pranoi se midis viteve 2013 deri në 2023 është paguar një faturë prej 17 miliardë lekë ndaj qytetarëve të larguar nga puna në shtet dhe që hapën procese gjyqësore.
Kjo shifër e lartë për dhjetë vjet tregon se si nga institucionet qendrore, komuna drejtori, reparte ushtarake etj. drejtësia tha se ishte shkelur ligji.
Top Channel
