PS e PD kanë bashkuar votat duke miratuar ndryshimet e reja në Kod Zgjedhor, për votën e diasporës.
Drafti i ndryshimeve u miratua me 108 vota pro dhe ndryshimet futen në fuqi menjëherë.
Me ndryshimet e fundit u hoqën pengesat, duke i hapur dritën jeshile votimit të diasporës në parlamentaret e 11 Majit.
Opozita u tërhoq nga të ngulmuarit e të votuarit të diasporës edhe me pasaporta jo shqiptare, por do të jetë komisioni rregullator në KQZ, i cili do të shqyrtojë këtë kërkesë të PD.
Ndër ndryshimet më të rëndësishme të Kodit Zgjedhor është se posta për votën e Diasporës në zgjedhjet parlamentare të 11 majit, do të paguhet nga shteti.
Në të njëjtën kohë, komisionit qëndror të zgjedhjeve i jepet 10 ditë më shumë kohë për të nisur me poste nëpër botë fletën e votimit dhe lista e kandidatëve për deputetë duhet të jetë gati 60 ditë para zgjedhjeve dhe jo 50 ditë siç ishte më parë.
Po ashtu, numërimi i fletëve të votimit të shqiptarë që jetojnë dhe punojnë jashtë Shqipërisë, do të bëhet me komisionerë partiake.
Me 107 vota pro u miratua edhe një vendim që rrit me 20 milionë lekë totalin e fondit që do tu shpërndahet partive politike për zgjedhjet e 11 majit.
“Duke iu referuar zgjedhjeve parlamentare të 25 Prillit 2021, fondi i alokuar nga Buxheti i Shtetit për fushatat zgjedhore të partive politike ishte 130,000,000 lekë.
Komisioni në vijim të diskutimeve gjatë mbledhjes vendosi që ky Fond të caktohet në vlerën 150,000,000 lekë, ose 20 milion lekë më shumë se vlera dysheme e parashikuar në dispozitat e Kodit Zgjedhor”, thuhet ne vendimin e miratuar.
Seanca plenare u karakterizua me disa ndërprerje pasi deputetët demokratë e përdorën edhe njëherë tjetër arrestimi e Erion Veliajt për politikë dite.
Top Channel
