Maratona e Tiranës, atletja Luiza Gega: Këtë vit do të provoj maratonën e plotë

“Kryesisht kam marrë pjesë më gjysmë maratonë por këtë vit dua të provojë maratonën e plotë, nuk është e lehtë. Më pëlqen shumë dhe gjithmonë kjo është arsyeja përse kam vrapuar sepse je në vendin tënd dhe mendojë që është kompeticioni më i bukur që zhvillon bashkia e Tiranës. Aty mblidhemi bashkë, qoftë profesionistë, amatorë. Kjo është arsyeja sepse më pëlqen maratona”, u shpreh Gega.

Maratona e Tiranës është një ndër aktivitete më të mëdha sportive që zhvillohet në kryeqytet, dhe ajo çka vihet re është fakti që interesi për të marrë pjesë rritet nga viti në vit.

“I ftojë që të gjithë të marrin pjesë jo patjetër për të fituar, po për të kaluar një ditë të bukur. Është një lodhje që të jep shumë kënaqësi dhe po ta fillosh jam e sigurt që nuk ndalon më”, shtoi atletja.

Sa i përket anës teknike të organizimit, çdo gjë është gati dhe pika kryesore e nisjes dhe ndarjes së çmimeve do të jetë sheshi “Skënderbej”. Ndonëse një garë, është një ditë që ofron dhe argëtim për pjesëmarrësit.

Taulant Stermasi, drejtues teknik i maratonës tha: “Në sheshin ‘Skënderbej’ do të jetë dhe starti dhe skena kryesore dhe gjithë cadrat ku do marrin shërbim sportistët. Jemi vërtet shumë të kënaqur me masivitetin. Maratona nuk është garë vetëm teknike është garë feste do me thënë marri pjesë gati 6-7 mijë qytetarë të Tiranës por dhe të botës sepse kemi 44 shtete që janë të regjistruar. Një festë e madhe sepse në shesh secili do këtë 3-4 veta të tjerë pra në shesh do të kemi 30 mijë veta si një ndeshje futbolli.”

Garuesit do të kenë mundësi që të garojnë në katër kategori: Maratona e plotë, Gjysmë Maratona, Tirana 10 km dhe  kategoria We Too për personat me aftësi ndryshe. Për tre vendet e para të çdo kategorie do të jepen çmime në vlera monetare.

Top Channel