Debatuan me njëri-tjetrin, vëllezërit plagosin 32-vjeçarin në Durrës 23/11 20:16
Klaus Gjasula ka vendosur të tërhiqet nga Kombëtarja shqiptare.
Mesfushori kuqezi ka mbyllur aventurën e tij me ekipin Kombëtar, i cili la gjurmë në historinë e Shqipërisë në Europianin “Gjermani 2024”.
Me anë të një postimi në rrjetet sociale, ai falënderon të gjithë ata që i kanë besuar, duke e quajtur këtë veprim si një vendim të duhur për t’i hapur rrugë të rinjve.
“Të dashur miq,
E kisha ëndërruar gjithmonë të luaja me Kombëtaren dhe e realizova. Isha në një Europian, shënova një gol dhe u ndjeva njeriu më i lumtur në botë. Nëse kthej kokën pas, kam plot momente të bukura me fanellën kuqezi, që nga grumbullimi i parë, te ndeshja debutuese ndaj Francës në “Stade de France” dhe tek ajo e fundit ndaj Kroacisë në Euro 2024. Edhe kur e mendoj tani ende dridhem nga emocionet.
Gjithsesi, jam menduar shumë kohët e fundit dhe me ftohtësi kam gjykuar e kam marrë vendimin për t’u tërhequr nga Kombëtarja. Është vendimi i duhur për t’u hapur rrugën të rinjve, që Kombëtarja jonë fatmirësisht ka shumë. Unë e realizova ëndrrën time dhe tani është koha për të tjerë që ta plotësojnë dhe ta jetojnë atë ëndërr.
Pas pesë vitesh do të kem mundësinë të vij në stadium dhe ta mbështes Kombëtaren tonë si tifoz. I jam falënderues Zotit, familjes time dhe të gjithë njerëzve që më kanë qëndruar pranë në çdo moment dhe kanë besuar tek unë.
Në veçanti dua të falënderoj edhe Federatën Shqiptare të Futbollit, Presidentin Armand Duka, trajnerët më të cilët kam punuar, Edoardo Reja dhe Sylvio Mendes Campos Junior, stafin teknik të Kombëtares dhe të gjithë bashkëlojtarët që ndamë këtë rrugëtim, që për mua është më i veçanti.
Sukseset e arritura nuk do të ishin të mundura pa tifozët më të mirë në botë, ata të cilët na kanë mbështetur gjithmonë, si në humbje, fitore apo barazim.
Faleminderit nga zemra të gjithë tifozëve kuqezi.
Për mua ishte nder dhe krenari të vishja fanellën e Kombëtares!”, shkruan Gjasula.
View this post on Instagram
34-vjeçari debutoi me Kombëtaren në vitin 2019 nën drejtimin e Eduardo Rejas. Ai luajti 29 ndeshje me përfaqësuesen shqiptare, në të cilat shënoi dhe një gol, i cili ndoshta është dhe më i rëndësishmi në karrierën e tij, atë kundër Kroacisë në Europianin që lamë pas.
Edhe Federata Shqiptare e Futbollit ka reaguar për këtë vendim të Gjasulës, duke e falënderuar atë për gjithçka që ka dhënë për fanellën kuqezi.
“Klaus Gjasula, pas #Euro2024, ka vendosur të tërhiqet nga Kombëtarja dhe FSHF e falënderon pafundësisht mesfushorin për kontributin e dhënë në fushë dhe jashtë saj. Klausi gjithmonë ka qenë një shembull në Kombëtare me angazhimin dhe sjelljen e tij. Faleminderit luftëtar!”, shkruan Federata.
Top Channel
