Motra e Egli Progës, e cila kryesoi marshimin nga sheshi “Skënderbej” drejt Kryeministrisë nuk i mbajti dot lotët për të vëllanë e vrarë disa ditë më parë.
Ndërsa kërkoi drejtësi dhe jo politizim të çështjes, ajo theksoi se 42-vjeçari u qëllua nga 4 barbarë, ku një prej të cilëve u dorëzua në mënyrë të kontrolluar, ndërsa 3 të tjerët janë lënë të lirë dhe “kanë 9 ditë që pinë raki”.
Motra e viktimës kërkoi rikthimin në burg të bashkëpunëtorëve dhe rikualifikimin e ngjarjes si vrasje me dashje.
“Prokuroria, gjykata dhe policia ta dëgjojnë mirë. Egli u vra nga 4 kriminelë në bashkëpunim me njëri-tjetrin.
Unë nuk akuzoj pa bazë vetëm sepse më ka vdekur vëllai me të cilin u rrita. I thashë prokurores se nuk mund të bëjë drejtësinë e vëllait tim. Ai u qëllua nga katër barbarë.
Njëri prej tyre u dorëzua në formë të kontrolluar, të tjerët kanë 9 ditë që pinë raki. Kjo është drejtësia? Prokurorja që la barbarët të pinë raki u hoq nga çështja pas kërkesës sime.
Horri që ka marrë përsipër vrasjen është organizuar që ta marrë ai që të shpëtojnë të tjerët.
Ky maskara kur u dorëzua në polici tha se Eglin nuk e preku fare me dorë. Nuk ka dëshmitarë, kamera.
Përse u dorëzua kur nuk ka prova? Sepse thanë se Egli vdiq nga pija?
Një nga vrasësit e vëllait tim fjeti gjumë dhe thirri avokatin për t’u dorëzuar. Ky maskara tha se Egli vdiq vetë, nuk e preku me dorë.
Policia e pa për 30 minuta që lëngonte në rrugë dhe nuk e prekën me dorë. Maskarai që e vrau e pa dhe nuk e ndihmoi. Ai ka emër, Leonidha Guçe. Hetimin do ta çoj deri në fund, ngrini zërin për çdo padrejtësi”, tha ajo mes lotëve.
Top Channel
