![](https://top-channel.tv/wp-content/uploads/2024/08/666_sd-1-1_sd-800x450.jpg)
Kryeministri Edi Rama ka uruar Roberta Metsola pasi u rizgjodh Presidente e Parlamentit Evropian, duke i kërkuar që të punojë ngushtë me Shqipërinë për të forcuar marrëdhëniet me BE-në.
“Urime të ngrohta për Roberta Metsola, për rizgjedhjen e saj si Presidente e Parlamentit Evropian. Rikonfirmimi i besimit nga Shtëpia Evropiane e Demokracisë me një votim të jashtëzakonshëm prej 562 votash është një dëshmi e lidershipit të saj të besueshëm, energjisë dhe vizionit në krye të një prej institucioneve kyçe të Bashkimit Evropian në këto kohë sfiduese për të gjithë.
E dashur Roberta, rizgjedhja jote është gjithashtu një lajm shumë i mirë për rajonin tonë dhe Shqipëria pret me padurim të vazhdojë të punojë ngushtë me ju për të forcuar marrëdhëniet me BE-në, për të mbrojtur dhe mbështetur vlerat e përbashkëta evropiane, si dhe sigurinë, prosperitetin dhe solidaritetin e një BE që i përkasim dhe punojmë çdo ditë për t’u bërë pjesë, ka shkruar Rama në X.
E zgjedhur për herë të parë në këtë post në janar 2022, politikania e Partisë Popullore Evropiane Malteze do të qëndrojë në këtë rol edhe për 2 vite e gjysmë pasi mori 562 vota në favor të saj nga 720 anëtarë të Parlamentit Evropian.
Ajo pritej gjerësisht të rizgjidhej pasi kandidoi praktikisht pa kundërshtarë. Vetëm Irene Montero e Majtë, ish-ministre e Barazisë e Spanjës, paraqiti në mënyrë simbolike kandidaturën e saj kundër Metsola. Montero mori 61 vota. Mandati pesëvjeçar i presidentit të Parlamentit është ndarë tradicionalisht në dysh midis socialistëve dhe demokratëve të qendrës së majtë (S&D) dhe PPE-së së qendrës së djathtë.
Kur vjen koha që S&D të zgjedhë një pasardhës të Metsola-s, opsionet përfshijnë Iratxe García të Spanjës, udhëheqës i grupit S&D në Parlament, ose një figurë udhëheqëse brenda Partisë Demokratike të Italisë, e cila është forca më e madhe në S&D.
Duke folur para votimit, Metsola reflektoi mbi edukimin e saj si një “grua që u rrit në një ishull në Detin tonë Mesdhe”, e cila mendonte për BE-në si një vend me standarde të larta, mundësi dhe potencial të pakufizuar, dhe që më pas bëri “të pamundurën”.
Top Channel