Mes luftërave në Ukrainë dhe Gaza/ Trump zgjedh Pete Hegseth si Sekretar të Mbrojtjes 13/11 07:30
Kryeministri britanik Rishi Sunak parashikohet të jetë i pari kryeministër në detyrë, që mund të humbasë në zonën e tij elektorale dhe të mos jetë më deputet në historinë e politikës britanike.
Sipas një sondazhi të botuar nga “Daily Telegraph”, një gazetë shumë pranë qeverisë së qendrës së djathtë, konservatorët e tij që ndodhen në pushtet prej 14 vitesh pritet të fshihen nga harta politike në vend! Kjo parti, më e vjetra në Britani rrezikon të marrë vetëm 53 deputetë, ku tre të katërtat e ministrave të kabinetit qeveritar nuk do të zgjidhen më dot deputetët.
Sipas “Daily Telegraph”, laburistët e qendrës së majtë, pritet të marrin 516 deputetë ose një shumice prej 382 deputetësh ose dyfishin e deputetëve qe fitoi Toni Bler në 1997-ën. Ndërkohë, partia e Reformës ose ish-partia e Brexit me kryetar Nigel Farage, edhe pse me mbështetje jo të vogël, por për shkak edhe të sistemit zgjedhor rrezikon të mos marrë asnjë deputet dhe kryetari i saj të dështojë pas 8 tentativave për t’u bërë deputet në parlamentin britanik. Eksponentë të lartë të partisë në pushtet në narrativën e tyre elektorale këto ditë të vetëbindur në humbjen katastrofale që i pret, më shumë po përqendrohen në minimizimin dhe frikësimin e elektoratit, se nëse fitojnë Laburistët kaq thellë, ata do të jenë parti e përjetshme në pushtet, edhe pse opsion i pabesueshëm në një demokraci si kjo britanikja!
Nëse konservatorët britanikë, do të pësojnë këtë humbje që parashikohet nga sondazhet, ku asnjë prej tyre në dy vitet e fundit nuk i nxjerr ata fitues, kjo do të jete humbja më e thellë në 200 vitet e fundit të një partie politike si Partia Konservatore, partia më e vjetër në Britani dhe e dyta më e vjetra në botë!
Top Channel
