Nuk ka qetësi për qytetet në Ukrainë! Sulmet me raketa vrasin disa persona, shënjestra vendet e banimit

Zyrtarët deklaruan se vendet e banimit u goditën këtë të martë në qytetin verilindor të Kharkiv, duke lënë 42 ukrainas të plagosur.

Kryebashkiaku i qytetit tha se një pjesë e një bllokut të banesave u shkatërrua dhe punonjësit e shpëtimit kërkuan nën rrënoja për të mbijetuar. Qielli mbi Kharkiv u kthye në portokalli, për shkak të zjarrit të madh që u krijua.

Banorja e Kharkiv Natalia tha për BBC se ky është sulmi më i keq që ka përjetuar që pas nisjes së luftës.

“Shtëpia ime u drodh. Ishte e gjitha shumë e zhurmshme. Pati shpërthime, pastaj dhjetë sekonda të tjera dhe një zhurmë tjetër. Shumë njerëz janë pa energji dhe ngrohje. Përveç frikës dhe urrejtjes, në këtë moment nuk ndjej asgjë”, tha ajo.

Të paktën një person u vra në qytetin industrial të Pavlohrad në rajonin e Dnipropetrovsk.

Në Kiev, sulmi ajror vazhdoi për më shumë se dy orë e gjysmë, më i gjati që nga 2 janari. Disa persona të tjerë u plagosën kur një bllok pallatesh mori flakë dhe një tjetër u dëmtua.

Një zëdhënës tha se një grua e re u nxor nga rrënojat, fillimisht ajo u raportua e vdekur por më pas u dërgua në spital. Gjendja e saj vijon të mbetet e rëndë dhe ndodhet në kujdesin intensiv.

Shumica e viktimave ishin në rrethet qendrore Solomianskyi dhe Sviatoshynsky perëndimore të Kievit.

Në rrethin Sviatoshinsky, disa ndërtesa banimi u dëmtuan. Disa orë pas sulmeve, shërbimet e urgjencës nisën kërkimet në vendngjarje, pasi dyshojnë se mund të ketë pjesë raketash të pashpërthyera.

Tre rajone të tjera të Kievit u dëmtuan gjithashtu nga pjesë raketash, pasi mbrojtja ajrore i ndaloi ruse gjatë sulmit.

Forcat ajrore të Ukrainës njoftuan se shkatërruan 21 nga 41 raketat e lëshuara nga Rusia gjatë natës.

Sulmet me raketa në qytetet e Ukrainës janë tani një realitet vdekjeprurës i kësaj lufte dhe sulmet janë intensifikuar javët e fundit.

Top Channel