Bashkëjetesa në komunitet dhe konfliktet që lindin mes banorëve që jetojnë në pallate duket se nuk janë zgjidhur në shumë qytete të Shqipërisë.
Edhe pse ka një ligj për të rregulluar bashkëjetesën në komunitet askush nuk e zbaton atë dhe qytetarët hasin probleme të shumta në pallate e ambiente të përbashkëta.
Madje ka raste kur banorë që braktisin shtëpitë e tyre, kthehen në rrezik për komshinjtë, sepse askush nuk ka të drejtë të ndërhyjë në banesat e braktisura private, por ndërkohë dëmtohen apartamentet e tjerë të pallatit.
I tillë është edhe rasti i zonjës Bianka Merko nga Berati. Ajo ankohet në Fiks Fare pasi nuk ka gjetur zgjidhje askund. Ajo banon në një pallat në rrugën ‘Tafil Skëndo’ dhe komshiu i katit të fundit të pallatit që është sipër znj. Merko e ka braktisur shtëpinë. Shtëpia e tij është e rrënuar totalisht dhe pa çati. Kjo sjell që shtëpia e Biankës është totalisht në lagështirë që i futet nga tavani dhe nga muret.
“Çfarë bie jashtë më hyn mua brenda, aq sa kam frikë të përdorë dhe pajisjet elektrike sepse edhe në mure është futur lagështia”, shprehet ajo. Edhe pse është përpjekur shumë të ndërgjegjësojë komshiun të investojë në banesën e tij të braktisur nuk ia ka dalë.
“Unë kur ka reshje detyrohem të largohem nga shtëpia kam frikën se më zë ndonjë korent, se pajisjet elektroshtëpiake më kanë dalë jashtë përdorimit”, pohon znj. Merko.
Por apartamenti i braktisur i filmuar nga Fiks Fare nuk është një rrezik vetëm për znj. Merko por edhe për këmbësorët që ecin poshtë palaltit. Duke qenë se nuk ka çati tullat e mureve nga lagështia rrezikojnë të bien. I kontaktuar nga komshija zotëria pronar i apartamentit të rrënuar i thotë që nuk ka lekë të investojë në apartament dhe e adreson që ta ndihmojë bashkia në hallin që ka. Pallati nuk ka administrator dhe nga bashkia nuk është vënë një i tillë duke u shkelur ligji Nr.10 112, datë 9.4.2009 për administrimin e bashkëpronësisë në ndërtesat e banimit.
Gazetarëve të Fiksit znj. Merko u tregon se i ka kaluar edhe këto hapa ankimi si në bashki po ashtu edhe në polici, por që askush nuk i ka ofruar ndihmë e zgjidhje përveç sorollatjes.
Së bashku me Fiksin zonja Merko i drejtohet fillimisht bashkisë ku punonjësi i thotë se nuk mund të ndërhyjnë në pronë private. Fiksi i cili vuri re se çatia ishte prishur edhe mbi pjesën e shkallëve të pallatit ndaj e pyeti edhe për atë pjesë, por punonjësi theksoi se nuk është kompetencë e bashkisë dhe as e policisë bashkiake.
Por u mjaftua duke pohuar se veprojnë vetëm në rast se kanë urdhër nga prokuroria. Pra zonja fillimisht duhet të bëjë një padi penale e më pas vazhdojnë porcedurat. Por bashkia në këtë rast ka pjesën e saj të përgjegjësisë pasi duhet të detyrojë pronarin e apartamentit të braktisur në marrjen e masave për të shmangur prishjen e njësisë (apartamentit) të denoncueses sipas ligjit në fuqi. Kjo gjë nuk ka ndodhur edhe pse znj. Merko ka depozituar disa herë ankesa me shkrim pranë bashkisë.
Denoncuesja dhe gazetarët e Fiksit i drejtohen edhe policisë për të bërë një denoncim. Policia sheh në vendngjarje edhe apartamentin dhe dëmet që janë bërë.
Pas disa kohësh denoncuesja njofton Fiksin se është kontaktuar nga policia e shtetit duke i thënë se zonja duhet të gjejë një avokat dhe të bëjë një padi. Vetëm me një vendim gjyqësor zonja mund të detyrojë fqinjin që të marr masa për zgjidhjen e situatës dhe rregullimin e banesës së saj.
Top Channel
