Nuk është befasi për brezin e sotëm që memet luajnë një rol jashtëzakonisht të rëndësishëm në jetën e përditshme. Duke filluar që nga qëllimet argëtuese në formën e imazheve, videove qesharake deri te format serioze të përcjelljes së mesazhit. Me ardhjen e internetit dhe zhvillimin teknologjik memet e internetit janë kthyer në argëtimin parësor.
Aktori Nicolas Cage në një intervistë për The Guardian shpreh një revoltë të brendshme për faktin se është ndër aktorët më të ‘memeifikuar’ në rrjetet sociale. “Nuk u bëra aktor për t’u bërë meme” thotë ai, jo pa nerv.
Nicolas Cage filloi të aktrojë në fillim të viteve 1980, fitoi një Oscar në 1996 për rolin brilant të një alkoolisti që arriti fundin, në filmin “Leaving Las Vegas”, më pas iu kthye roleve të heroit në filmat aksion si The Rock, Con Air dhe Face/Off. Por fama që arriti si aktor nuk e kishte përgatitur për “skenarin” e memeve në epokën që do të vinte.
“Unë mund të kem qenë aktori i parë që kaloi një lloj memeifikimi,” thotë ai, duke aluduar në përhapjen e memeve së bashku me variacione të panumërta të videove me pjesë nga rolet e tij. “Isha i frustruar sepse nuk e dija se çfarë po merrnin njerëzit nga filmat e mi, përveç këtyre memeve.”
— Davide Mckenzie🎗 (@MrKungFooy) July 24, 2017
Si fëmijë, Cage e kishte parë tashmë famën nga afër. Halla e tij, Talia Shire, ishte një yll nga The Godfather (me regji nga vëllai i saj, dhe xhaxhai i Cage, Francis Ford Coppola) shumë kohë përpara se ai të bënte filmin e tij të parë. Të qenit i njohur për meme dhe mashup, megjithatë, është ndryshe.
“Nuk e kuptoja se si ta përpunoja atë që po ndodhte. Unë u futa në aktrim sepse u preka nga performanca e filmit më shumë se çdo formë tjetër arti. Nuk u futa në filma për t’u bërë meme. Kjo ishte e re”
Ai e bindi veten se ndoshta këto meme do ta detyronin dikë të kthehej dhe të shikonte filmat e tij. “Shiko, unë nuk luaj kumar, por fama është si bixhozi“, thotë Cage.”Kur fama të kthehet mbi ty, efektet e humbjes, si me lojërat e fatit, janë më të thella se efektet e fitimit.”
A është kthyer fama mbi të?
“Oh po! Ka pasur momente kur gjërat janë transmetuar në financat e mia, apo gabimet që kam bërë janë bërë jashtëzakonisht publike dhe e kam ndjerë të gjithë këtë.”
Përtej varrit, Silvio Berlusconi “jeton” si një meme
Këto shaka vizuale që qarkullojnë dhe bëhen virale mund të jenë gjithashtu mjete të fuqishme për vetë-shprehje, lidhje, ndikim social dhe madje edhe përmbysje politike. Rasti i politikanit italian Silvio Berlusconi është shumë interesant për faktin se ai ka lënë një trashëgimi memesh online që vazhdojnë e mbajnë “në jetë” edhe sot. Nëse kërkon në TikTik me “Cavaliere,” ose “Cav” të shfaqen video, imazhe, tekste grafike të një trashëgimie që vazhdon prodhon para edhe pas vdekjes.
Silvio Berluskoni është politikani më i memeifikuar. Ai ishte një njeri dhe politikan i fuqishëm, dhe kjo ishte edhe për shkak të mënyrës se si ai e ktheu në një spektakël personalitetin e tij. Arriti të kthente politikanin në një personazh televiziv dhe më vonë në një meme. Berlusconi ishte i pari që nisi një formë të re të komunikimit populist, duke krijuar një kult televiziv të personalitetit me perandorinë e tij televizive Mediaset përpara se Vladimir Putin dhe madje edhe Donald Trump të bënin të njëjtën gjë. Ai është një pionier i përdorimit politik të memeve.
Në muajt e tij të fundit, në moshën tetëdhjetë e pesë vjeç, gjatë fushatës së përgjithshme elektorale të verës së kaluar, Berlusconi hapi një profil TikTok për t’u lidhur me gjeneratën Z. “Ai më në fund kishte gjetur platformën e përsosur për të”
Në TikTok, truket e tij vërtet rezonuan me përdoruesit. Videoja e parë mori mbi 10 milionë shikime. Për herë të parë, Berlusconi po bënte drejtpërdrejt dhe në mënyrë aktive një meme të vetes në internet. Ekipi i mediave sociale e përdori këtë duke ngarkuar momentet virale të së kaluarës të Berlusconit. Sot, profili i tij në TikTok ka më shumë se 800,000 ndjekës. Edhe pse në botën e përtejme, ai e vazhdon jetën në botën tonë si një meme.
Origjina e Memes
Meme nuk është e re: ajo daton nga libri i biologut evolucionar Richard Dawkins i vitit 1976, “Gjeni egoist”. Në konceptin e Dawkins për termin meme është ky shpjegim;”një njësi e transmetimit kulturor“, si ekuivalenti kulturor i një gjeni: “Ne kemi nevojë për një emër për fjalën e re, një emër që përcjell idenë e një njësie të transmetimit kulturor, ose një njësi imitimi. ‘Mimeme’ vjen nga greqishtja, por dua një fjalë që tingëllon pak si ‘gjen’. Shpresoj se miqtë e mi tradicionalë do të më falin nëse shkurtoj mimeme në meme. Nëse ju ngushëllon, kjo fjalë e re mund të mendohet si alternativë që lidhet me ‘kujtesën kolektive’ ose me fjalën franceze même.” U shkruante ai kolegëve më 1976 për librin e tij.
Dawkins përshkroi se saktësisht kujt i referohej fjala: “Shembuj memesh janë meloditë, idetë, frazat tërheqëse, modelet e rrobave, mënyrat e prodhimit të poçeve ose të ndërtimit të harqeve. Ashtu si gjenet përhapen në pishinën e gjeneve duke kërcyer nga trupi në trup nëpërmjet spermës ose vezëve, ashtu edhe memet përhapen në grupin e memeve duke kërcyer nga truri në tru nëpërmjet një procesi që, në kuptimin e gjerë, mund të quhet imitim.”
Megjithatë meme-ja e parë, në kuptimin modern të fjalës është Dancing Baby. Fëmija që kërcen ka hyrë në histori se meme-ja e parë në epokën e internetit.
Top Channel
