Sport Të Fundit

Nis epoka e re te Gjermania, zyrtarizohet trajneri i ri i Kombëtares

22/09/2023 12:49

Julian Nagelsmann është zyrtarisht trajneri i ri i kombëtares gjermane.

Federata Gjermane e Futbollit ka prezantuar “ish”-in e Bayernit këtë të premte si pasardhësin e Hansi Flick në stolin e 4 herë kampionëve të botës.

DFB ka zbuluar dhe disa nga detajet e kontratës. 36-vjeçari ka nënshkruar një kontratë deri në 31 korrik të vitit të ardhshëm, ose e thënë më thjeshtë, deri pas finaleve të kampionatit europian Euro 2024. Që do të organizohet në Gjermani.

Nagelsmann, i cili do të përfitojë rreth 400 mijë euro në javë, do të shfrytëzojë miqësoret që do të zhvillohen deri në verën e vitit të ardhshëm. Ish-trajneri i Bayernit do të drejtojë skuadrën në ndeshjen e parë në 14 tetor, në miqësoren me Shtete e Bashkuara të Amerikës.

Edhe pse vetëm 36 vjeç, Nagelsmann ka spikatur në botën e trajningut. Hapat e para i hodhi me moshat e Hoffenheimit, para se të drejtonte skuadrën e parë. Më pas shkëlqeu tek Leipzigu, ku drejtoi nga 2019 deri në verën e 2021.

Pastaj “gradimi” në pankinën bavareze. Me Bayernin arriti të fitonte titullin (2022), ndërkohë që ka marrë dhe dy medalje si fitues i Superkupës së Gjermanisë.

Në horizont për të është një tjetër sfidë e madhe: Kombëtarja. Nagelsmann nis një detyrë të bukur por edhe të vështirë, pasi duhet të ringrejë Gjermaninë, që ka zhgënjyer në vitet e fundit.