Pallatet e shpallura të pabanueshme në qytetin bregdetar të Durrësit janë kthyer në fole të përdoruesve të lëndëve narkotikëve.
Të dhënat sugjerojnë se që nga vitet 90-të kemi një rritje eksponenciale të përdoruesve. Ekspertët gjithashtu flasin për një rritje me 50 % gjatë dekadës së fundit. Nëse në vitin 2012 ishin 40 mijë përdorues, ky numër tashmë përllogaritet në 80 deri në 100 mijë përdorues. 8 mijë prej tyre konsiderohen të varur nga droga.
Instituti i Shëndetit Publik realizon çdo vit studime mbi nivelin e përdoruesve të drogës, por në faqen zyrtare studimet e publikuara janë shumë të vjetra. Burime konfidenciale thonë për “Inside Story” se në sirtarët e ISHP flenë disa studime të reja me të dhëna interesante, por që nuk janë bërë publike për shkak se duhen adresuar politika të veçanta. Me vetëm një qendër toksikologjie në të gjithë vendin, shërbimet për përdoruesit e drogës janë anemike.
“Bëhet fjalë për rreth 100 mijë persona që kanë varësi nga lëndët narkotike, pra janë rreth 100 mijë familje në Shqipëri janë të prekura drejtpërdrejtë nga problemi i varësisë së drogës”- u shpreh Orges Hysenaj, nga Teen Challenge.
“Nëse bëjmë një panoramë në Shqipëri numri i përdoruesve është në rritje, këtë e shohim edhe në qendrat tona. Shifrat variojnë nga 50-60 mijë por unë besoj se janë më shumë, të paktën përdorues të një droge njëherë në jetën e tyre, flasim për ata përdorues që janë bërë të varur, janë 7-8 mijë. Kanabis mes të rinjve është në rritje”- u shpreh Genci Mucollari, Aksion Plus.
“Aksion Plus” e themeluar në vitin 1992, është e vetmja qendër në Shqipëri por edhe në rajon që ofron terapinë zëvendësuese të heroinës me metadon…
Çdo ditë, deri në orën 11, ata që janë regjistruar pranë kësaj qendre vijnë e marrin metadonin. Të gjithë janë përdorues të heroinës. Ka mes tyre që qëndrojnë në terapi edhe me dekada, pa mundur të shkëputen nga varësia. Doza që ata marrin ndryshon në varësi të peshës, kohës se përdorimit të heroinës dhe kohës së qëndrimit në terapi. Aktualisht këtë terapi e marrin rreth 1000 persona, nga të cilët rreth 140 janë në burg.
Për shkak të varësisë dhe faktit, atyre u nevolitet patjetër një dozë në ditë, këta persona mund të bëhen edhe problematikë. Ka raste që persona të caktuar e shesin terapinë. Ata pinë diçka për veten e tyre pastaj ose mund ta shesin ose e shkëmbejnë me heroinë. Pikërisht për të shmangur këtë gjë, metadonin ua japin të holluar me ujë që ta konsumojnë në qendër. Metadoni është një terapi që zëvendëson efektin e heroinës. Është njësoj sikur një person diabetik që merr insulinën çdo ditë.
“Kemi raste që kanë filluar terapinë në 2005 dhe janë ende këtu. Shumica e tyre janë përsëritës, që mund të dalin për një farë kohe dhe rikthehen sërish”- u shpreh Genci Mucollari, nga Aksion Plus.
Top Channel
