Situata e rënduar në Lindjen e Mesme/ Shpallet jashtë shërbimit edhe spitali i fundit në Gaza, OBSH ngre alarmin 28/12 16:41
Fushatën e tij, e kishte mbështetur tek premtimet për të luftuar korrupsionin dhe bandat kriminale.
Fernando Villavicencio, anëtar i Asamblesë Kombëtare dhe kandidat në zgjedhjet presidenciale të Ekuadorit ishte nga të paktët që guxuan të bënin hapur lidhjet mes krimit të organizuar dhe zyrtarëve qeveritarë vendas. Guximi i kushtoi shtrenjtë: Villavicencio u qëllua për vdekje pak pas largimit nga një tubim elektorale me simpatizantë të tij në qytetin verior të Kuitos. Një pjesëtar i ekipit të fushatës së tij, u ka thënë mediave lokale se 59 vjeçari ka qenë duke hyrë në makinë kur një burrë i ka dalë përpara dhe e ka qëlluar në kokë.
Dëshmitarët thanë se Villavicencio u qëllua tre herë me armë. Autori i dyshuar i ngjarjes po ashtu u plagos gjatë shkëmbimit të zjarrit me forcat e sigurisë, dhe më vonë ndërroi jetë nga plagët e marra. Në total, nëntë persona u plagosën në këtë incident.
“Nuk e kuptojmë ku ishte policia, ku ishte mbrojtja policore..Dihej që Fernando ishte i rrezikuar, dhe jo më larg se këto ditët e fundit ishte kërcënuar nga një grup kriminal. Përse nuk ishte policia këtu për të mbrojtur jetën e tij dhe të gjithëve neve që ishim këtu me të.”- Galo Valencia, xhaxhai i Fernando Villavicencio.
Presidenti Guillermo Lasso, u zotua se ky “krim nuk do të mbetet pa ndëshkim” dhe shpalli gjendjen e jashtëzakonshme.
“Dekreti i dytë shpall gjendjen e jashtëzakonshme për 60 ditë. Forcat e Armatosura nga ky moment janë mobilizuar në të gjithë territorin kombëtar për të garantuar sigurinë e qytetarëve, qetësinë e vendit dhe zgjedhjet e lira e demokratike të 20 gushtit.” – Guillermo Lasso, president.
Gjashtë persona u arrestuan në lidhje me vrasjen pas bastisjeve të policisë në Quito. Raundi i parë i zgjedhjeve presidenciale është planifikuar të zhvillohet më 20 gusht.
Top Channel
