SHBA: Rusia po përshkallëzon konfliktin me praninë e trupave koreano-veriore 18/11 22:44
Një vajzë 11-vjeçare nga një familje britanike është qëlluar për vdekje teksa po luante në kopshtin e saj në Francë, pas një mosmarrëveshjeje të raportuar mes fqinjëve.
Familja po shijonte një barbeque të shtunën në mbrëmje kur të shtënat ndodhën në fshatin Saint-Herbot, në veri të Quimper në Brittany.
Prindërit e vajzës janë lënduar gjithashtu, ndërsa babai ka pësuar lëndime të rënda, raportojnë mediat lokale.
Mbretëria e Bashkuar tha se po ofronte ndihmë për një familje britanike.
Vajza dhe motra e saj tetë vjeçare po luanin ndërsa prindërit e tyre kujdeseshin për skarën, kur një fqinj filloi t’i qëllonte me një armë gjahu nga një gardh.
Vajza më e vogël vrapoi në shtëpinë e një fqinji tjetër për të ngritur alarmin dhe tani thuhet se është në shok.
I dyshuari, i përshkruar si një shtetas holandez 71-vjeçar, thuhet se u mbyll në shtëpinë e tij pas incidentit, por përfundimisht u dorëzua në polici dhe u arrestua së bashku me gruan e tij.
Vendasit thanë se burri ishte një i vetmuar që ishte në mosmarrëveshje me familjen britanike për një ngastër toke ngjitur me dy pronat.
Mediat lokale raportuan se familja jetonte në fshat prej disa vitesh.
Prokurorja Carine Halley tha se rrethanat rreth incidentit nuk dihen ende.
Marguerite Bleuzen, kryetarja e komunës Plonévez-du-Faou, tha: “Ne e njihnim mirë familjen. Ka një festë fshati çdo vit dhe ata vinin gjithmonë. Është e pakuptueshme të qëllosh një fëmijë. Askush nuk mund ta kuptojë se si mund të ketë ndodhur kjo.”
Një zëdhënëse e Zyrës së Jashtme, Komonuelthit dhe Zhvillimit të Mbretërisë së Bashkuar tha: “Ne po ofrojmë ndihmë konsullore për familjen britanike pas të shtënave në Francë dhe jemi në kontakt me autoritetet lokale”.
Top Channel
