Turistja 31 vjeçare humb jetën teksa bënte ‘selfie’ nga buza e kraterit të vullkanit në Indonezi (fotot)
23/04 21:38
Të paktën 42 të vdekur, 11 të zhdukur, dëme pafund, kaos dhe frikë në Haiti.
Reshjet e dendura të shiut kanë shkaktuar përmbytje masive në Haiti, ku 13 mijë vetë u detyruan të zhvendosen nga shtëpitë e tyre prej vërshimit të ujërave që kanë prekur pothuajse gjysmën e kombit të varfër ishullor.
Qyteti i goditur është Leogane, në jug-perëndim të kryeqytetit Port-au-Prince. Tre lumenj kanë dalë nga shtrati në atë zonë, duke bërë që veç varfërisë, jetët e mjaft njerëzve atje, të pllakosen edhe nga tragjedia.
“Arrita të shpëtoj vetëm njërin nga fëmijët e mi. Fëmija tjetër, tre vjeç, u rrëmbye nga uji. Mund t`i kisha humbur të dy, por Zoti më shpëtoi njërin sepse mbeti i varur në pemë”, tha një banor.
Kryebashkiaku i Leogane, Ernson Henry, tha se “banorët e qytetit ishin të dëshpëruar. Ata kanë humbur gjithçka. Ujërat ua kanë shkatërruar fushat, ua kanë shpërndarë kafshët shtëpiake”.
Kryeministri Ariel Henry njoftoi nga ana tjetër se qeveria e tij, bashkë me partnerët ndërkombëtarë, po “merrte masa urgjente” për ta luftuar këtë katastrofë. Programi Botëror i Ushqimit u shpreh i gatshëm të furnizojë banorët e evakuuar me ushqime e ujë të pijshëm.
Infrastruktura e vendit është ndërkohë e dëmtuar nga tërmetet e shumta të mëdha, e operacionet e shpëtimit vështirësohen edhe nga problemet e vazhdueshme të Haitit me bandat kriminale, që kontrollojnë shumë zona të vendit.
Top Channel
