Ekskluzive/ Vetting-u e shkarkoi nga drejtimi i Policisë Lezhë, Vehbi Bushati merr detyrën e re në Policinë e Shtetit

30/05/2023 17:55

Vehbi Bushati, që u shkarkua nga drejtimi i Policisë së Lezhës për mos plotësimin dhe mos dorëzimin e formularit të të deklarimit të pasurisë dhe formularin e vlerësimit të aftësive profesionale, ka marrë detyrën e re këtë të martë.

Nga burime pranë policisë, gazetarja Brixhilda Deda mëson se Bushati do të mbajë postin e këshilltarit në kabinetin e drejtorit të Përgjithshëm në Policinë e Shtetit. Emërimin e Bushatit në këtë post e ka firmosur vetë drejtori i Përgjithshëm, Muhamet Rrumbullaku, sikurse duket në dokumentin e siguruar nga Top Channel.

Vehbi Bushati ushtroi detyrën si drejtor i Drejtorisë Vendore të Lezhës për 1 vit e dy muaj.


Më datën 24 maj, trupa vlerësuese e kryesuar nga Suela Baluku vendosi shkarkimin nga detyra të drejtorit të Policisë Lezhë, Vehbi Bushati pasi ky i fundit nuk kishte dorëzuar formularët për deklarim pasurie, pastërti figure dhe aftësitë profesionale.

Top Channel u interesua pranë Policisë së Shtetit ku mësoi se drejtori i policisë së Lezhës kishte dorëzuar pranë komisionit të vetting-ut dosjen qëkur ky proces nisi në vitin 2018. Por, për vlerësimin kalimtar dhe periodik të punonjësve të policisë doli një udhëzim i ri ku procesi do të kryej nga Agjencia e Mbikqyrjes Policore e për rrjedhojë dosja duhej ridërguar, ç’ka drejtori i Lezhës nuk e kreu pavarësisht njoftimeve zyrtare të dërguara nga komisioni.

Top Channel