Zyra e BE-së në Prishtinë i kërkoi qartazi autoriteteve të Kosovës që “të respektojnë me përpikëri procedurat ligjore në lidhje me shpronësimin e pronës së paluajtshme”, dhe të bëjnë gjithçka që kanë në dorë për të garantuar respektimin e të drejtave pronësore të pronarëve të tokave.
Në fokus të deklaratës së saj ishte sidomos veriu i vendit. Duke kujtuar se shpronësimi është në vetvete një proces i ndjeshëm, blloku i tregon ekzekutivit Kosovar hapat e kujdesshëm që duhet të ndjekë.
“Procedurat ligjore parashikojnë hapa të tillë si njoftimi i avancuar dhe informacioni gjithëpërfshirës i pronarëve të pronave, e drejta e tyre për të paraqitur komente mbi shpronësimin e kërkuar, mundësia e një mjeti të përshtatshëm juridik dhe kompensimi i duhur i tyre përpara se procesi të përfundojë”, nënvizohet në deklaratë.
Prishtina zyrtare miratoi në 10 maj vendimin për shpronësimin e tokave në komunat me shumicë serbe në veri të Kosovës, Leposavic dhe Zubin Potok. Autoritetet kosovare njoftuan se shpronësimi kryhet me qëllimin “realizimin e realizimit të projekteve infrastrukturore me interes publik”. Aksionet përgatitore për shpronësimin e tokës në Leposavic kanë filluar në fillim të vitit, por popullata vendase serbe e kundërshton ashpër atë, nën pretendimin se është një “proces i paligjshëm”.
Problem i madh për serbët në veri është se qëllimi i shpronësimit është ndërtimi i një baze për policinë kufitare të Kosovës.
Top Channel
