Domatet, të gjitha për eksport/ Fermerët po shesin me 180 lekë kilogramin me shumicë

Stresi klimaterik ka bërë që këtë vit të ketë më pak prodhim domatja, por fermeri Qerim Elezi nga Belshi thotë se çdo gjë e keqe e ka një të mirë. Pas shumë vitesh bujku shqiptarë një kilogram domate po e shet me çmimin e shumëdëshiruar, ku një kilogram domate po blihet 180 lekë më çmim shumice. Ai thotë se domatja shqiptare po preferohet nga qytetarët serb për këtë arsye ajo po shkon e gjitha për eksport dhe jo për tregun vendas.

Pas 13 vitesh në emigrim,Qerimi la Italinë për të mbjellë 10 mijë rrënjë me domate në 4 dynym sera. Për 35-vjeçarin rikthimi në atdhe ka qenë vendimi i duhur, pasi në këto vitë toka i ka dhënë fitimin që ka pritur. Ai thotë se kërkesat për domaten e hershme shqiptare janë të mëdha jo vetëm nga konsumatori vendas, por edhe ai europian.

“Prodhimi është më i pakët sepse i ftohti i dimrit na ka dëmtuar katin e parë të bimës dhe për këtë arsye kokrra ka mbetur e vogël. këtë kokërr nuk e merr eksporti, por tregu vendas. Deri më tani unë të gjithë domaten e kam dërguar në tregun e Lushnjës dhe ajo që kam mësuar është se domatja ime ka shkuar në Serbi. Kam akoma shumë kërkesa, por prodhimi është i pakët dhe nuk u përgjigjëm dot të gjithëve. Ndërsa si çmim është shumë i mirë nëse e krahasojmë me vitin e kaluar, ku një kilogram domate e shita 150 lekë, ndërsa kësaj herë 180 lekë”, shprehet fermeri.

Qerimi thotë se ka bërë zgjedhjen e duhur që në tokën e tij mbjellë vetëm domaten e ëmbël “rossalinë”. Ky vendim erdhi pas dështimit me kulturat e tjera bujqësore.

“Më parë kam mbjellë kastravecin, specin e kuq, kungullin, por pamë që domatja të sjell më shumë fitim dhe u përqendruam këtu. është më tepër fitim prurëse”, thotë fermeri.

Por domatja e ëmbël rossalinë, po vijnë me çmim të kripur për qytetarët, ku një kilogram domate në dyqanet e fruta perimeve po shitet 230-260 lekë.

Top Channel