Xhevahire Veliaj para 15 vitesh u ka marrë dy qytetarëve nga Gramshi 100 milion lekë borxh me gënjeshtrën se do u kthente 150 milion. Por që prej asaj dite askush nga qytetarët nuk kanë parë lekë me sy prej saj.
Xhevahire Veliaj është e arrestuar dhe dënuar disa herë për veprën penale të ‘mashtrimit”.
Dy qytetarët iu drejtuan Fiks Fare , si mundësia e fundit për të marrë paret e tyre. Ata pohojnë se i kanë dhenë njëri 50 milion lekë dhe tjetri 100 milion lekë Xhevahire Veliajs në mirëbesim, pasi e kishin njohur nga një mik i tyre.
Askush nuk ka asnjë dokument në lidhje me dhënien e këtyre parave borxh Xhevahires , por kanë të tjera fakte si mesazhe të shkëmbyera në telefon dhe letra të shkruajtura nga mashtruesja, ku u kërkon lekët borxh. Gjithmonë sipas tyre Xhevahirja nxirrte pretekst ndonjë fatkeqësi , prandaj i duheshin dhe lekët. Por gjithmonë me premtimin se do ua kthente dhe jo vetëm shumën e marrë por më shumë.
Qytetarët edhe pse kishin shkuar disa herë në shtëpinë e saj ku i priste nuk kishin mundur të merrnin lekët e tyre. Ajo i priste, por u kërkonte të mos ta bënin të madhe, pasi familjarët e saj nuk ishin në dijeni të borxhit të marr nga ajo.
Të mashtruarit pohojnë për Fiksin se ato ishin lekë të punës së tyre në emigrim dhe të vëllezërve, me të cilët aktualisht janë në konflikt.
Marrjen e lekëve borxh Xhevahire Veliaj e pranon në një xhirim të kryer nga qytetarët e dëmtuar. Ajo pranon se u ka marrë lekët dhe se do ua kthejë, por që për momentin nuk e disponon shumën. Madje ajo do t’i përcjelli duke u thënë se deri në qershor do u japi 10 milion lekë.
Gazetarët e Fiksit u munduan të kontaktojnë me Xhevahire Veliajn, por numri i saj i telefonit dilte i zënë. Në këto kushte ata u lidhën me bashkëshortin e saj i cili u tha gazetarëve se do ua nxirrte Xhevahiren në telefon sapo të shkonte në shtëpi. Gjë që nuk ndodhi.
Por Fiksi zbuloi se Xhevahire Veliaj mashtrimin e kishte profesion të vjetër. Ajo ka qenë e dënuar për veprën penale të ” mashtrimit”. Po ashtu në 2011 ishte arrestuar në Elbasan për një tjetër rast të ngjashëm, vjedhjen nëpërmjet mashtrimit të një zonje duke i marrë 20 milion lekë dhe që nuk ia kishte kthyer.
Top Channel
