Mediat kanadeze padisin inteligjencën artificiale OpenAI për shkelje të të drejtës së autorit (fotot)
29/11 21:55
Zgjedhjet e përgjithshme parlamentare po mbahen sot në Itali, ku pritet të zgjidhet qeveria e re, ndërsa votimet kanë nisur prej orës 07:00 të mëngjesit.
Mbi 50 milionë qytetarë pritet të hedhin votën e tyre këtë të diel.
Sipas sondazheve, këto zgjedhje të përgjithshme të parakohshme mund të krijojnë qeverinë më të djathtë që ka pasur vendi që nga Lufta e Dytë Botërore, e udhëhequr nga kryeministrja e parë grua.
Zgjedhjet e parakohshme u nxitën pasi mosmarrëveshjet e brendshme rrëzuan në korrik Qeverinë e Unitetit Kombëtar të ish-kryeministrit, Mario Draghi.
Kush pritet të dalë fitues?
Sondazhet treguan vazhdimisht se koalicioni i qendrës së djathtë i udhëhequr nga partia nacionaliste, Vëllezërit e Italisë, e Giorgia Melonit dhe që përfshinte gjithashtu partinë Liga Veriore të Matteo Salvinit dhe Forza Italia të Silvio Berlusconit ishin në rrugën e duhur për një fitore të qartë.
Liderja e partisë Vëllezërit e Italisë, Giorgia Meloni, do të ishte zgjidhja më e mundshme për postin e kryeministrit, si kryetare e partisë kryesore të koalicionit.
Ka pasur spekulime gjatë mbylljes së sondazheve se Liga Veriore ka pësuar rënie të ndjeshme, ndërsa është rritur mbështetja për partinë me prirje të majta, Lëvizja 5-Yje.
Çfarë do të jetë vendimtare?
Partia Vëllezërit e Italisë ka pasur një rritje të mbështetjes elektorale pasi qëndroi jashtë Qeverisë së Draghit. Liga Veriore, e udhëhequr nga Matteo Salvini dhe Forza Italia e Silvio Berlusconit ishin të dyja pjesë e Qeverisë dhe mbështetja ndaj tyre ka rënë, sipas Radio Evropa e Lirë.
E djathta është ndihmuar edhe nga ndasitë e bllokut të së ashtuquajturës “qendra e majtë”, ku përpjekjet e Partisë kryesore Demokratike (PD) për të formuar një aleancë të gjerë elektorale, dështuan.
Si rrjedhojë, tashmë janë tri grupe kryesore të qendrës ose të qendrës së majtë që luftojnë për vota – PD-ja dhe aleatët e saj; partia qendrore Veprimi dhe aleati i saj Italia Viva; dhe në fund Lëvizja 5 yjet.
Sistemi zgjedhor i Italisë favorizon grupet që janë në gjendje të krijojnë aleanca të gjera, me gjasë duke favorizuar fitoren e bllokut të krahut të djathtë.
Oggi puoi contribuire a scrivere la storia 🇮🇹 pic.twitter.com/6u3sKvjJSo
— Giorgia Meloni 🇮🇹 ن (@GiorgiaMeloni) September 25, 2022
Cilat janë çështjet kryesore për votuesit?
Ashtu si në shtetet e tjera evropiane, kriza dhe rritja e kostos së jetesës ka lënë në hije shqetësime të tjera si emigrimi, pensionet dhe shërbimet publike. Aleanca konservatore ka kërkuar uljen e taksave në të gjithë vendin për të ndihmuar italianët të përballen me rritjen e çmimeve, ndërsa PD-ja kërkon që ulja e taksave të përqendrohet drejt shtresave me të ardhura më të ulëta.
Lëvizja 5-Yjet ka përkrahur një skemë për lehtësimin e varfërisë të quajtur “paga e qytetarëve” që ajo e prezantoi derisa ishte pjesë e Qeverisë.
Meloni ka shprehur mbështetjen e saj për politikat perëndimore ndaj Rusisë pas pushtimit të Ukrainës. Salvini i ka bërë thirrje Bashkimit Evropian që të mbrojë italianët nga efektet anësore ekonomike të sanksioneve të vendosura ndaj Rusisë mbi agresionin e saj ushtarak ndaj Ukrainës.
Berlusconi shkaktoi polemika të premten teksa mbrojti Putinin, duke thënë se ai ishte “shtyrë” në luftën kundër Ukrainës dhe se donte vetëm të instalonte një qeveri “njerëzish për së mbari” në Kiev.
Cilët janë aktorët kryesorë?
Meloni, 45 vjeç, një ish-ministre e Rinisë, i ka dhënë vitalitet partisë së saj, e cila ka rrënjë post-fashiste dhe pritet që të marrë 25 për qind të votave, krahasuar me 4 për qind që kishte marrë në zgjedhjet e fundit në vitin 2018.
Salvini, 49 vjeç, një ish-ministër i Brendshëm, i cili mban një qëndrim të ashpër ndaj emigracionit, por që ka bërë një sërë gabimesh politike gjatë tre vjetëve të fundit dhe është eklipsuar nga Meloni.
Berlusconi, 85 vjeç, një ish-kryeministër që ka arritur të mposhtë shëndetin e lig dhe skandalet e shumta duke mbetur një lojtar kryesor në aleancën e djathtë, edhe pse tashmë Forza Italia e tij është partneri më i vogël mes tri partive kryesore të saj.
Enrico Letta, 56 vjeç. Kreu i Partisë Demokratike dhe një tjetër ish-kryeministër. Dështimi i tij për të ndërtuar një koalicion të qëndrueshëm të partive të qendrës së majtë bëri që ai të përballej me një disfatë politike.
Giuseppe Conte, 58 vjeç, udhëheqës i Lëvizjes 5-Yjet. Si kryeministër gjatë periudhës 2018-21, ai shkaktoi zemërim kur partia e tij tërhoqi në korrik mbështetjen ndaj Qeverisë së Draghit, duke nxitur përçarje që çuan në zgjedhje të parakohshme.
Kur mbahen votimet?
Vendvotimet janë të hapura nga ora shtatë e mëngjesit deri në orën 23:00 sipas kohës lokale.
Pothuajse 51 milionë italianë kanë të drejtë të votojnë, nga të cilët 4.7 milionë jetojnë jashtë vendit.
Votuesit do të zgjedhin një Parlament me një numër të reduktuar ulësesh në Dhomën e Ulët (400 nga 630), ndërsa Senati do të ketë 200 vende nga 315 të mëparshme.
Ku është fokusi?
Synimi kryesor i koalicionit të djathtë do të jetë fitimi i shumicës në të dy dhomat e Parlamentit. Kjo dukej se ishte pothuajse e sigurt kur u publikuan sondazhet e fundit, por një rritje e mbështetjes ndaj Lëvizjes 5-Yjet në jug mund ta bëjë më të vështirë fitoren në Dhomën e Lartë në Senat.
Një shumicë prej më shumë se dy të tretave do t’i hapte rrugën Parlamentit për të bërë ndryshime në Kushtetutë pa pasur nevojën e referendumeve.
Parlamentarët e zgjedhur nga zonat elektorale jashtë territorit të Italisë mund të ndryshojnë ekuilibrin në një garë të ngushtë — ka tetë vende të tilla në dispozicion në Dhomën e Ulët dhe katër në Senat.
Çfarë pritet të ndodhë më pas?
Formimi i koalicioneve në Itali është një procedurë jashtëzakonisht e ngadaltë, por perspektiva e një rezultati më të qartë do të thotë se ka pak gjasa të përsëritet 2018-a, kur u deshën pothuajse tre muaj për të formuar koalicionin qeverisës.
Parlamenti i ri do të mblidhet më 13 tetor. Pas kësaj date, presidenti i Republikës së Italisë, Sergio Mattarella, mund të fillojë konsultimet me drejtuesit e partive për të diskutuar për kabinetin e ri qeveritar.
15:27 Ringritja e së djathtës/ Efekti domino i fenomenit “Meloni” në Europë
Ajo që ndodh në politikën italiane, nuk qëndron zakonisht në Itali, kështu e nis analizën Bloomberg për zgjedhjet që po mbahen këtë të diel atje, dhe që siç të gjitha shenjat tregojnë fitues do të jetë një koalicion i ekstremit të djathtë më ne krye Giorga Meloni me partinë e saj Fratelli d’Italia. Nga fashizmi në nazizëm; nga Berlusconi te Trump; Nga Lëvizja Pesë Yjet që zgjoi trazira deri te përçarja e shkaktuar nga mediat sociale, Italia shpesh ka shërbyer si një laborator politik për demokracitë liberale.
13: 20 Zgjedhjet në Itali, 19% e qytetarëve votuan deri në orën 12:00
19% e qytetarëve kanë marrë pjesë në votim deri në orën 12:00 për zgjedhjet parlamentare në Itali. Sipas mediave italiane, kjo shifër është në përputhje me vitin 2018. Në total janë 7904 bashku ku pritet të votojnë mbi 50 milionë qytetarë.
12:50 Silvio Berlusconi voton në Milano: Hera e parë që shoh radhë!
Kreu i Forza Italia, Silvio Berlusconi, votoi në selinë e shkollës fillore në via Fratelli Ruffini në Milano.
“Është hera e parë që shoh radhë për të shkuar për të votuar. Nuk kam parë asnjëherë radhë në vitet e tjera”, tha ai teksa priste të hynte në qendrën e votimit së bashku me partneren e tij Marta Fascina.
12:32 Analizë: Giorgia Meloni, një rrezik për Italinë dhe Evropën
The Guardian ka publikuar këtë të diel në ditën e zgjedhjeve parlamentare në Itali një analizë të gazetarit italian, Roberto Saviano, i cili shprehet se nëse Giorgia Meloni, zgjidhet kryeministre e Italisë, kjo do të përbënte një rrezik për vendin dhe Evropën.
11:00 Zgjedhjet në Itali, Presidenti Mattarella voton në Palermo
Presidenti i Italisë, Sergio Mattarella votoi në orën 08:45 në shkollën Giovanni XXIII – Piazzi në Palermo. Kreu i shtetit votoi, ndërsa u përshëndet me duartrokitje nga të pranishmit.
Ekstremistët e djathtë të “Fratelli d‘Italia” kryesojnë me 22 përqind sondazhet, nga katër përqind në vitin 2018. Kryetarja Girogia Meloni mund të bëhet e para grua kryeministre e Italisë.
Top Channel
