![](https://top-channel.tv/wp-content/uploads/2024/07/ramaa_sd-1-800x450.jpg)
Brentford konfirmohet edhe në javën e 6-të si një skuadër surprizë në këtë edicion të Premier League.
7 gola për tri pikë në “Community Stadium”, me skuadrën e Frank që triumfoi thellë, 5-2 përballë Leeds United, duke e parakaluar edhe në klasifikim.
Sfida u zhbllokua pas 28 minutash lojë, me Toney i cili luajti rolin e protagonistit edhe në minutën e 38′ me golin e dytë. Në frymën e fundit të pjesës së parë, Leeds ngushtoi rezultatin me Sinisterra në minutën e 45+1′.
Në pjesën e dytë, Toney ishte përsëri protagonist, me sulmuesin anglez i cili ishte në formë fantastike dhe riktheu qetësinë te vendasit me golin e tretë në minutën e 58′. Leeds rihapi takimin në minutën e 79’ me Roca, por vendasit nuk falën asgjë duke shënuar edhe dy herë të tjera me Mbeumo në minutën e 80′ dhe Wissa në 90+2′.
5-2 dhe tri pikë shumë të rëndësishme për Brentford që koleksionon kështu fitoren e 2 sezonale dhe prek koutën e 9 pikëve në vendin e 7, ndërsa Leeds United mbetet me 8 pikë dhe zbret në vendin e 9.
Në “St. James Park”, Newcastle nuk shkoi më shumë se barazimi 0-0 përballë Crystal Palace. Vendasit kishin kontrollin e sfidës në pjesën më të madhe, por vuajtën mungesën e finalizimit. “Qymyrxhinjtë” shkojnë kështu në kuotën e 7 pikëve, ndërsa “shqiponjat” vijnë më pas me një pikë më pak.
Çmenduri në “City Ground” me Bornemouth që triumfoi me përmbysje ndaj Nottingham Forest me rezultatin 2-3.
Një sfidë e jashtëzakonshme, pasi vendasit e mbyllën pjesën e parë në avantazhin e dy golave, me autorë Kouyate 33′ dhe Johnson 45+2′.
Dukej si një sfidë e mbyllur që në 45 minutat e para, por në fraksionin e dytë, Bournemouth realizoi përmbysjen e çmendur duke shtangur vendasit. Billing shënoi në minutën e 51′, ndërsa Solanke barazoi në minutën e 63′. 3 minuta nga fundi i kohës së rregullt, Anthony shënoi golin e përmbysjes duke i dhënë fitoren skuadrës së tij.
Forest regjistron humbjen e tretë radhazi dhe prek fundin me vetëm 4 pikë në vendin e 18-të, ndërsa Bournemouth shkon në kuotën e 7 pikëve në vendin e 13-të.
Tottenham nuk fal asgjë në shtëpi, pas suksesit 2-1 përballë Fulham. Skuadra e Conte-s zhbllokoi rezultatin 5 minuta nga fundi i kohës së rregullt me Hojbjerg, ndërsa Kane dyfishoi në minutën e 75′ duke i dhënë komoditet londinezëve. Gjithsesi, gjërat i trazoi një gol i Mitrovic në minutën e 83′, por nuk ndryshoi asgjë në rezultat.
Tottenham rikthehet te fitorja dhe prek vendin e dytë momentalisht me 14 pikë, ndërsa Fulham mbetet me 8 pikë në vendin e 10-të.
Wolves gjen fitoren e parë sezonale në “Molineux Stadium” dhe këtë e bënë përballë Southampton me rezultatin minimal 1-0 fal golit të Podence në minutën e 45+1′.
Wolves ngjitet kështu në vendin e 14-të me 6 pikë, ndërsa “shenjtorët” qëndrojnë në kuotën e 7 pikëve në vendin e 12-të./ Super Sport
Top Channel