Ministria e Shëndetësisë njoftoi më 19 gusht se në Kosovë është regjistruar një viktimë dhe 519 raste të reja me koronavirus.
Sipas raportit ditor, numri i infektimeve të reja me sëmundjen COVID-19 del pas testimit të 1.921 mostrave. Përqindja e testeve që kanë dalë pozitive për koronavirus është 27.01 për qind.
MSH-ja po ashtu njoftoi se në 24 orët paraprake janë shëruar edhe 779 persona, ndërsa raste aktive aktualisht janë 4.586.
Radio Evropa e Lirë shkruan se Kosova ka regjistruar rastet e para me koronavirus në mars të vitit 2020. Shteti po ashtu po vazhdon fushatën e imunizimit, edhe pse numri i qytetarëve që po marrin vaksina është më i vogël.
Gjatë 24 orëve të fundit, 46 persona janë imunizuar kundër koronavirusit, bëri të ditur MSH-ja. Ndërkaq, në total deri më tani autoritetet shëndetësore kanë administruar mbi 1.8 milion doza të vaksinës.
Top Channel
