40 drejtues mjetesh janë gjobitur gjatë javës që lamë pas në Tiranë, pasi janë kapur duke shkelur rregullat e qarkullimit rrugor.
Policia njofton se këta shoferë kanë qenë duke drejtuar mjetin në gjendje të dehur ose pa leje drejtimi, për largim nga vendi i aksidentit apo për drejtim mjeti në mënyrë të parregullt, veprime që rrezikojnë jetën e tyre dhe qytetarëve përreth.
Katër shoferë janë kapur duke përdorur telefonin gjatë drejtimit të mjetit apo pa vendosur rripin e sigurimit, të cilët për t’i shpëtuar masës administrative kanë tentuar të korruptojnë punonjësit e Policisë, duke iu ofruar shuma lekësh.
Një 21-vjeçar që ka përplasur një shtetase dhe më pas është larguar nga vendgjarja ka rënë në pranga. Sipas policisë, shtetasi me iniciale R.P. duke kryer parakalim të gabuar në zonën e Paskuqanit dhe me shpejtësi tej normave të lejuara plagosi 44-vjeçaren me iniciale D. E.
Gjatë javës janë pezulluar 201 leje drejtimi, të ndara sipas shkeljeve:
35 për “Drejtimi i mjetit nën ndikimin e alkoolit”,
150 për “Kufizimet e shpejtësisë”,
16 për shkelje të tjera të Kodit Rrugor.
Janë tërhequr 19 palë targa të modifikuara, që nuk i përkisnin mjetit ose ishin të ç’regjistruara në vendet e origjinës; janë bllokuar 26 mjete, për mungesë dokumentacioni.
Janë vendosur 6352 masa administrative, me një mesatare 906 masa të vendosura në ditë, konkretisht:
– 89 masa për drejtim mjeti nën ndikimin e pijeve alkoolike
– 93 masa për mosrregullim të shpejtësisë/gara shpejtësie;
– 166 për xhama të zinj;
– 206 masa për parakalime të gabuara;
– 760 masa për përdorim të aparatit të celularit gjatë drejtimit të mjetit;
– 583 masa për mosvendosjen e rripit të sigurimit, nga këto 34 pasi pasagjerët nuk kishin vendosur rripin e sigurimit;
– 132 masa për mosvendosjen e kaskës mbrojtëse;
– 2809 masa për qëndrim/pushim të gabuar të mjetit;
– 55 masa administrative për mungesë siguracioni;
– 1459 masa për shkelje të ndryshme.
Top Channel
