Shtetasja ukrainase, Snezhana Poljanska, dha një intervistë ekskluzive në një lidhje skype për emisionin “Open” në Top Channel.
Ajo tregoi frikën që po përjetojnë bashkëkombasit e saj dhe i bëri thirrje të gjithë vendeve të ndihmojnë Ukrainën.
“Nuk është një mbrëmje e këndshme për shtetin tonë, faleminderit që më keni ftuar në emisionin tuaj për t’i tregar të gjithëve çfarë po ndodh në vendin tonë. Aktualisht ndodhem në Ivanofrakisk. Tani të gjithë njerëzit po duan të largohen nga qyteti se ka një situatë kritike, po bëhet gati për një mundësi sulmesh ajrore dhe gratë e kalamajtë janë larguar. Meshkujt po qëndrojnë,” tha ajo.
Ku po strehohen gratë e fëmijët?
Shumë qytetarë po shkojnë në Poloni, se Polonia po hap dyert për familjet ukrainase. Shumë shkojnë nëpër shoqëritë e tyre.
Ju vetë do largoheni?
Jam akoma e tronditur nga sirenat që kam dëgjuar. Si është e mundur të largohem ndërkohë që të gjithë rrugët janë bllokuar. Dëshira dhe gjëja kryesore është për të mbrojtur kalamajtë.
Keni frikën e një sulmi? Do bombardohet qyteti juaj?
Nëse Ukraina bie, bie e gjithë bota. Ne do luftojmë për vendin tonë, mos lejoni që kjo të ndodhë, na ndihmoni neve.
NATO nuk do ndërhyjë në Ukrainë, cila është frika juaj më e madhe?
Ne po kërkojmë çdo gjë, armë, njerëz, informacione. Mos lini Ukrainën vetëm. Putin kërkon të pushtojë të gjithë botën, nëse nuk do e ndaloni të gjithë bashkë, ai do e marrë të gjithë botën.
A ka mundësi Ukraina të përballet dhe të fitojë këtë luftë?
Ne mund të përballemi, do qëndrojmë.
Top Channel
