Fiks Fare/ Mësuesja e ciklit fillor jep gjithë lëndët në klasë kolektive, udhëzimi i ministrisë ndalon mësuesit shtesë

Pesë prindër nga fshati Kolanec në Maliq ankohen në Fiks Fare se fëmijët e tyre mësojnë në një klasë kolektive dhe mësimin ua bën vetëm një mësuese e ciklit  fillorë.  Bëhet fjalë  për gjashtë fëmijë, që nga klasa e gjashtë deri në klasën e nëntë. Ata kërkuan ndihmën e Fiksit,  pasi kanë bërë disa tentativa në ZVA Maliq ku kanë kërkuar një mësues shtesë për lëndët e matematikës dhe të gjuhës shqipe, por deri më tani nuk kanë marrë asnjë përgjigje. ” Ne kemi kërkuar mësues shtesë për fëmijët tanë dhe kërkesën tonë e kemi depozituar në instancat përkatëse që në datë 27 shtator. Na përcollën me fjalët që do na e sjellin por deri më sot fëmijët tanë nuk kanë parë ndonjë mësues të ri” shprehen prindërit.

Pyetjes nëse fëmijët kanë hasur probleme gjatë procesit arsimor në mënyrën e mësimdhënies së mësueses, prindërit  tregojnë se mësimi fillon në 8 e 30 dhe mbaron në 12 e 30 “një mësues i vetëm nuk ka çfarë të bëj në aq kohë, thjesht u thotë hapni librat merrni këtë detyrë dhe kaq” pohojnë njëzëri. “Na kanë sjellë një mësues për lëndën e fizkulturës një herë në javë, ne kemi nevojë për mësues të lëndëve kryesore. Vetë mësuesja aktuale na ka thënë gjeni një mësues tjetër, sepse nuk i përballon dot. Ne kemi nevojë për mësues shtesë nuk duam t’i transferojmë fëmijët në shkollë tjetër në Maliq dhe të mbyllet shkolla” shprehen prindërit për Fiksin.

Gazetarët e Fiksit panë nga afër mjedisin e shkollës, ku mësuesja shprehet se ndjen vështirësi në dhënien e mësimit me klasa kolektive. ” një mësues shtesë sidomos për lëndët bazë matematik, biologji e kimi duhet, pasi dhe vetë nxënësit ndjejnë vështirësi në këto lëndë” pohon mësuesja.

Fiksi merr informacion edhe në ZVA Maliq, ku drejtoresha Gentjana Braho fillimisht falënderoi gazetarët në ngritjen e problemit dhe premtoi se do u kthente një përgjigje zyrtare si dhe një zgjidhje për nxënësit.

Në përgjigjen e saj Zyra Vendore Arsimore  Maliq shpjegoi se në bazë të udhëzimit të ministrisë më datën 28 korrik 2021, kur ka më shumë se 10 nxënës mësimi zhvillohet i ndarë vetëm në lëndët: Gjuhë Shqipe, Gjuhë e huaj dhe Matematikë.

Duke qenë se në shkollën ‘Teki Kolaneci’  numri i nxënësve është më i vogël se 10 në bazë të vendimit nuk çohen mësues shtesë. Për këtë arsye nxënësve u ofrohet mundësia e ndjekjes së procesit arsimor në shkollën 9- vjeçare “Agimi” në Maliq.

ZVA Maliq  në zbatim të VKM nr 682 për përdorimin e fondeve publike për transportin e mësuesve dhe nxënësve që mësojnë jashtë vendbanimit, siguron pagesën për transportin. Por deri më sot vetëm një prind e ka transferuar fëmijën në shkollën e Maliqit me shpenzimet personale,  kurse fëmijët e tjerë vazhdojnë të mësojnë në klasën kolektive në Kolanec.

Top Channel