Vijojnë tensionet në Partinë Demokratike. Një grup deputetësh mbështetës të ish kryeministrit Sali Berisha i gjetën sot të mbyllura dyert e selisë, ku siç deklaruan kishin shkuar për të zhvilluar një mbledhje.
Përplasjet vijnë në një kohë kur mbështetësit e ish-kryeministrit Berisha kanë thirrur një protestë në datën 8 janar në oborrin e Partisë Demokratike, ditë në të cilën shprehen, demokratët do të marrin në kontroll shtëpinë e tyre.
Por nga ana tjetër, Sekretari i Përgjithshëm Gazment Bardhi, foli për demokratë që i kanë dalë zot selisë gjatë gjithë këtyre viteve, duke paralajmëruar se kush nxit akte dhune nuk do ja arrijë qëllimit.
Nga videot e publikuara në media është parë që selia e PD-së është fortifikuar me qëllimin për të ndaluar këdo që do tentojë të futet me dhunë në mjediset e brendshme të godinës.
Videot treguan dyer të blinduara dhe fortifikim me profile hekuri. Këtyre masave i janë shtuar edhe disa prozhektorë të vendosura në disa pika të selisë, pas aludimeve që protestuesit e opozitës mund të “ngujohen” në oborrin e Partisë Demokratike.
Kujtojmë se deri në datën 5 janar, mbështetësit e ish-kryeministrit Berisha i lanë kryetarit Lulzim Basha një afat për të liruar selinë e Partisë Demokratike. Data 8 janar është njoftuar si dita kur ata kanë thirrur një protestë në selinë e partisë, kundër Lulzim Bashës, të cilin ata e konsiderojnë të shkarkuar nga drejtimi i forcës kryesore të opozitës.
Megjithatë, prej disa ditësh, të dy palët kanë shkëmbyer replika të ashpra, të nxitura edhe nga ndërhyrjet që kreu i PD-së Basha ka nisur në godinën e selisë. Sot, po një grup anëtarësh të Komisionit të Rithemelimit dhe pas tyre disa gra mbështetëse të ish-kryeministrit Berisha kanë shkuar në seli, për të zhvilluar, siç thanë, një mbledhje. Në fakt, shfaqja e tyre, ngjante më tepër një përpjekje për të mbajtur gjallë tensionin e brendshëm e se ultimatumi mbetej në fuqi, si dhe për të dëshmuar se kishin pasur të drejtë kur akuzuan Lulzim Bashën se ka blinduar selinë e Partisë, duke e krahasur atë me ish-burgun famëkeq amerikan Alkatraz.
Mbështetësit e ish-kryeministrit Berisha e kanë akuzuar Lulzim Bashën si “peng mjeran i Edi Ramës për aferat e tij”, duke theksuar se po reagon në mënyrën më të turpshme dhe kriminale. Sipas tyre, Basha në vend që të shfrytëzonte ditët e afatit tolerant për të mbledhur rraqet e veta, ai vendosi të blindojë selinë, duke fortifikuar dyer dhe hyrje dritaresh të selisë së demokratëve shqiptarë. Ata i bënë thirrje se selia e demokratëve nuk është një pronë private e tij, njëlloj siç pengmarrësi i tij, e konsideron ndërtesën e Kryeministrisë.
Në deklaratën e tij, Komisioni i Rithemelimit “paralajmëron binomin Rama – Basha se, për skenarin e tyre antidemokratik dhe destabilzues do të marrin si përgjigje të merituar turpin e historisë”.
Prej disa muajsh Partia Demokratike është përfshirë në një betejë të brendshme, mes zotit Basha dhe ish pararendësit të tij Berisha, i cili synon të rimarrë drejtimin e forcës kryesore të opozitës, pasi u la jashtë grupit parlamentar, për shkak të shpalljes non grata nga Shtetet e Bashkuara.
Top Channel
