Politika shqiptare kthen sytë nga 8 dhjetori i 1990

Në këtë ditë nuk kanë munguar as mesazhet e klasës politike, ku përmes rrjeteve sociale, përcollën edhe urimet e tyre.

Presidenti i Republikës së Shqipërisë, Ilir Meta, zgjodhi të kthehej pas në kohë, në atë që ai e quan “dita e ardhjes së pluralizmit politik”.

Për kreun e shtetit shqiptar sot me rëndësi të madhe është liria, demokracia, pluralizmi politik dhe kthimi i tyre në shinat e qëndrueshme së bashku me të ardhmen evropiane, sipas tij dhe vota e lirë gjithëpërfshirëse mbeten vendimtare në këtë proces, duke shtuar më tej se në fund fare “liri demokraci jo vonë, por tani”.

Presidenti i bëri thirrje rinisë shqiptare të marrë në dorë fatet e vendit.

“Për gjithë studentët ne presim shumë prej tyre edhe ata duhet të marrin në dorë udhëheqjen e proceseve demokratizuese në Shqipëri sepse guximi i tyre e përgjegjshmëria për të ardhmen janë të pazëvendësueshme”, tha ai.

Kryeministri i Shqipërisë, Edi Rama në ditën e rinisë solli në vëmendje shpalljen e Tiranës, vitin e ardhshëm, si Kryeqyteti Evropian i Rinisë.

Për të, 8 dhjetori duhet t’u kushtohet vetëm të rinjve.

Ndërkohë, lideri i selisë blu, Lulzim Basha, e ka cilësuar këtë ditë si motiv për të vijuar thirrjen se “duhet luftuar diktatura e sotme”.

“Thirrja për Shqipërinë si gjithë Evropa mbetet një kushtrim për të përmbushur amanetin e të rinjve dhe të rejave që sakrifikuan për liri e demokraci”, shkruan ai.

Kryeopozitari Basha thekson se “8 Dhjetori 1990 është dita që ndau të shkuarën nga e ardhmja” dhe “ndryshoi përgjithmonë” historinë e Shqipërisë.

Urimit të kësaj dite iu bashkua edhe Ambasada e Shteteve të Bashkuara të Amerikës në Tiranë.

Në mesazhin e tyre, për “8 dhjetorin”, ambasada amerikane shprehet krenare se ka mbështetur popullin shqiptar, ndërsa shfaq gatishmërinë për t’i qëndruar sërish në krah shqiptarëve “ndërsa ata përqafojnë të ardhmen”.

Prej vitit 2009, me vendim të marrë nga Kuvendi i Shqipërisë, kjo datë përkujtohet si festë kombëtare në nderim të të gjithë studentëve të dhjetorit 1990 dhe gjithë rinisë shqiptare.

Më 8 dhjetor 1990, një grup studentësh e pedagogësh të Universiteteve të Tiranës, u bënë iniciatorë e protagonistë të kthesës së madhe historike, protestave paqësore që sollën rënien e sistemit komunist dhe lindjen e demokracisë.

Lëvizja Studentore e vitit 1990 është e vetmja Lëvizje paqësore që ndryshoi historinë e Shqipërisë.

Me shprehjen “E duam Shqipërinë si gjithë Europa”, të rinjtë kërkuan ngritjen e sistemit të vlerave perëndimore dhe të shtetit të së drejtës; integrimin në Europë dhe garantimin e pluralizmit politik si bazë kryesore për një shoqëri të lirë e demokratike.

Akti i tyre publik, sa qytetar aq edhe politik, i dha fund në mënyrë paqësore epokës të gjatë të vetëizolimit dhe të sundimit ideologjik, duke i hapur kështu rrugën e ekonomisë së tregut dhe shoqërisë së hapur.

Vlerat e kësaj dite bëhen gjithnjë e më shumë vlera kombëtare, sepse ndryshe nga ngjarjet e tjera 8 dhjetori nuk pati dy palë, një fituese dhe një të humbur.

Top Channel