Ndryshime në qeveri/ Vasilika Vjero largohet nga posti i zv.ministres së Financave 27/11 17:35
Anëtarësimi i Shqipërisë në BE, zgjedhje të lira dhe lufta kundër korrupsionit, ishin temat kryesore të diskutimit gjatë takimit të kryetarit të Partisë Demokratike Luzlim Basha me Ministrin për Europën dhe Çështjet Ndërkombëtare të Austrisë, Michael Linhart.
Në një shënim në rrjetin social Facebook, Basha shkruan se priti me kënaqësi ministrin për Europën dhe Çështjet Ndërkombëtare të Austrisë, Z. Michael Linhart, të cilit i shprehu mirënjohjen për mbështetjen e çmuar dhe të kahershme të Austrisë për Shqipërinë, e në veçanti në përpjekjen tonë historike për integrimin në Bashkimin Europian.
Më tej, Basha thekson se me Linhart ndau prioritetet e Partisë Demokratike për garantimin e zgjedhjeve të lira dhe të ndershme, për luftën kundër krimit të organizuar dhe korrupsionit, për prerjen e lidhjeve të politikës me krimin, që sipas tij, për një periudhë të gjatë kanë penguar dhe vonuar rrugëtimin e vendit tonë drejt BE-së.
“Jam i lumtur që me Ministrin dhe përfaqësuesin e simotrës tonë Partisë Popullore të Austrisë, bashkëndajmë bindjen se Bashkimi Europian është alternativa e vetme për rajonin, si dhe e sigurova se anëtarësimi i Shqipërisë në BE mbetet prioritet absolut i Partisë Demokratike, si garanci për ndërtimin e një të ardhmeje më të mirë për qytetarët shqiptarë”, shkruan Basha.
Top Channel
