Angli/ Vrasja e mësueses, akuzohet shqiptari! Prokurorja: Vrasje brutale e paramenduar

Koçi Selamaj, 36 vjeç ish shpërndarës picash, përmes video link nga burgu , ka deklaruar vetëm emrin dhe datën e lindjes.

Në seancën e mëparshme gjyqësore një ditë pasi iu ngritën akuzat, avokati mbrojtës tha se klienti i tij nuk e pranon akuzën e vrasjes.

Nga kjo seancë gjyqësore raporton Top Channel, kanë dalë disa detaje për mënyrën e vrasjes të Sabinës, por jo motivet dhe çfarë provash ka mundur të mbledhë policia të cilat lidhin Koçi Selamajn me vrasjen.

Prokurorja Alison Morgan QC i  tha gjykatës se Sabina Nessa është goditur me një objekt rreth 60.96 cm dhe se sulmi ishte i paramenduar.

“Kemi të bëjmë me një sulm ku është përdorur dhunë në një nivel të lartë me paramendim” tha prokurorja Morgan.

Prokuroria angleze thotë se nga hetimet rezulton se Sabina mbrëmjen e  17 shtatorit,  u sulmua tek sa po ecte përmes një parku në drejtim të një lokali ku do të takohej me një shoqe.

Trupi i saj u gjet 24 orë më pas afër një qendre komunitare.

Gjykatësi  Judge Mark Lucraft QC vendosi për Selamajn të qëndrojë në burg deri në seancën e radhës më 16 Dhjetor kur atij do t’i duhet të shprehet për akuzën e ngritur e më pas të caktohet një datë për gjykimin.

Nga informacionet e deritanishme Selamaj  jetonte në zonën Eastbourne.

Kishte 5 vite që jetonte si emigrant në Angli dhe ishte i martuar me një shtetase rumune.

Sipas mediave britanike të cilat  kanë intervistuar në Elbasan fqinjët e Koçi Selamajt, ata  janë shprehur se ai vinte nga një familje shumë e mirë e cila kishte emigruar në Greqi shumë vite më parë.

Top Channel