Turqia kërkon të rrisë volumin tregtar në $50 miliardë me Afrikën, me vizitën e kryeministrit të Lesotos (fotot)
19/11 18:15
Presidenti i ri i Iranit, Ebrahim Raisi, emëroi një udhëheqës të ri në krye të agjencisë bërthamore të vendit.
Media shtetërore raportoi se Mohammad Eslami, i cili më herët ka shërbyer si ministër i Strehimit dhe Transportit, do të drejtojë Organizatën Civile të Energjisë Bërthamore të Iranit.
Ai do të zëvendësojë shkencëtarin Ali Akbar Salehi, i cili ka luajtur rol vendimtar në arritjen e një marrëveshjeje bërthamore me fuqitë botërore, në vitin 2015.
Me këtë marrëveshje, Irani ka kufizuar aktivitetin e tij bërthamor, në këmbim të lehtësimit të sanksioneve ndërkombëtare.
Marrëveshja, megjithatë, është lëkundur, pas tërheqjes së SHBA-së prej saj, në vitin 2018.
Bisedimet për shpërtimin e saj pritet të rinisin në shtator, pas disa rundesh të dështuara.
Bisedimet përfshijnë përfaqësues të vendeve që kanë nënshkruar marrëveshjen bërthamore me Iranin: Kinës, Francës, Rusisë, Britanisë dhe Gjermanisë.
Shtetet e Bashkuara marrin pjesë në bisedime me ndërmjetësimin evropian.
Irani këmbëngul se programi i tij bërthamor ka synime paqësore, por fuqitë e huaja druajnë se ai synon krijimin e bombës atomike.
Eslami, inxhinier i trajnuar në SHBA, ka lidhje me industrinë ushtarake të Iranit.
Ai ka shërbyer si zëvendësministër në departamentin e kërkimeve të Ministrisë së Mbrojtjes.
Top Channel
