Një plagosje me armë zjarri është regjistruar këtë të mërkurë në Fier.
Shtetasi Hajredin Nazëraj pas një konflikti të çastit për motive të dobëta ka nxjerrë armën e gjahut dhe ka plagosur kushëririn e tij, shtetasin Klement Nazëraj.
I plagosur është dërguar menjëherë në spital dhe ndodhet nën kujdesin e mjekëve, ndërsa policia arriti të kap autorin dhe ka sekuestruar armën e gjahut.
66 vjeçari është arrestuar nga policia për veprën penale “Plagosja e rëndë me dashje”.
“Sot rreth orës 09:00, në fshatin Vreshtas, Fier, shtetasi H. N., 66 vjeç, pas një konflikti për motive të dobëta, ka plagosur me armë gjahu shtetasin K. N., 37 vjeç, i cili ndodhet në spitalin e Fierit nën kujdesin e mjekëve. Menjëherë në vendngjarje shkuan shërbimet e Policisë, të cilët bënë të mundur kapjen e autorit të dyshuar dhe shoqërimin e tij në Komisariatin e Policisë Fier.
Në vijim të veprimeve hetimore, specialistët për Hetimin e Krimeve në Komisariatin e Policisë Fier bënë arrestimin në flagrancë të shtetasit H. N., për veprën penale”, thuhet në njoftimin e policisë.
Materialet do i kalojnë Prokurorisë Fier, për veprime të mëtejshme procedurale.
Top Channel
