‘Krishti u ngjall’, besimtarët ortodoksë në të gjithë vendin kremtojnë Pashkën
05/05 00:47
Partia Demokratike e ka cilësuar “antikushtetues” vendimin e Kuvendit për ta shkarkuar presidentin Ilir Meta me 104 vota pro.
Me anë të një reagimi, PD i kërkon Gjykatës Kushtetuese që të ruajë paanësinë dhe të garantojë pavarësinë e institucioneve kushtetuese. Ndër të tjera thotë se akti i Kuvendit, vjen pas zgjedhjeve të 25 prillit që i cilëson si “masakra zgjedhore dhe grabitja më e madhe e votave e kryer ndonjëherë”.
Sa i përket kryeministrit Rama, thotë se ka përdhosur Kushtetutën dhe është ekspozuar para shqiptarëve si armik i demokracisë dhe shtetit ligjor.
Reagimi i PD
Sulmi antikushtetues i Parlamentit ilegjitim mbi Institucionin e Presidentit të Republikës është akt që thellon edhe më shumë tiparet antidemokratike të regjimit Rama-Doshi. Ky akt vjen menjëherë pas masakrës zgjedhore dhe grabitjes më të madhe të votave të kryer ndonjëherë.
Përfaqësuesit e krimit të organizuar në Kuvendin njëpartiak të Shqipërisë nuk mund të jenë kurrë garant të Kushtetutës dhe as nuk mund të marrin vendime në emër të saj. Edi Rama ka përdhosur me qindra herë Kushtetutën e Shqipërisë dhe është ekspozuar përpara çdo shqiptari si armik i demokracisë dhe shtetit ligjor.
Partia Demokratike e konsideron antikushtetues vendimin e Kuvendit njëpartiak për shkarkimin e Presidentit të Republikës dhe kërkon nga Gjykata Kushtetutese të ruajë paanësinë dhe të garantojë pavarësinë e institucioneve kushtetuese, duke refuzuar farsën për shkarkimin e Presidentit të Republikës.
Në votimin për shkarkimin e Metës kanë marrë pjesë 114 deputetë, nga të cilët 105 pesë deputetë votuan pro, 7 deputetë kundër dhe 3 abstenim. Pak më herët me 104 vota pro, 7 kundër, 2 abstenim dhe 1 fletë votimi që ishte e pavlefshme, Parlamenti miratoi raportin përfundimtar të Komisionit Hetimor.
Komisioni Hetimor i gjeti shkelje kushtetute presidentit Meta, ndaj i propozoi parlamentit shkarkimin.
Nga ky hetim komisioni hetimor theksoi se presidenti Ilir Meta u kthye në frymëzues të dhunës duke shkelur nenin 88 të kushtetutës si dhe atë 98 duke u përfshirë në fusharë elektorale. Pjesë e provave të renditura në raport është edhe konkluzioni paraprak i monitorimit të zgjedhjeve të 25 Prillit nga OSBE-ODIHR, për të faktuar përfshirjen e kreut të shtetit në fushatë elektorale.
Komisioni mbërriti edhe në përfundimin se presidenti përmes disa shkresave ndërhyri në punën e institucioneve të pavarura.
Në raportin final, Komisioni Hetimor thotë se janë konsumuar gjatë 19 intervistave televizive, 9 deklaratave, 45 postimeve në Facebook dhe shkresave dërguar institucioneve.
Përmes këtij raporti me 97 faqe, të komisionit hetimor, shumica socialiste iu drejtuar seancës plenare ditën e sotme për ta bërë fakt shkarkimin e presidentit Ilir Meta nga parlamenti. Ndërkaq Meta ndonëse është thirrur nuk ka pranuar të shkojë në asnjë mbledhje të komisionit.
Top Channel
