Në pritje për të mësuar nëse do të luajnë në Champions apo Europa League sezonin e ardhshëm, drejtuesit e Milanit kanë nisur që tani të mendojnë për merkaton dhe po planifikojnë lëvizjet që do të kryejnë gjatë verës.

Ashtu siç dihet tashmë, politika e klubit është që të afrojë futbollistë të rinj të talentuar, të ndërthurur me të tjerë me eksperiencë të madhe në arenën ndërkombëtare dhe për këtë arsye dyshja Maldini-Massara kanë piketuar dy francezë për sulmin.

I pari është 34-vjeçari i Francës, Olivier Giroud, i cili ishte pranë kuqezinjve edhe në muajin janar, por nuk u arrit marrëveshja dhe te Milani përfundoi kroati Mario Mandzukic, i cili ishte i lirë atëherë. Situata ndryshon këtë verë, pasi sulmuesit të “gjelave” i përfundon kontrata me Chelsean dhe mund të transferohet në Milano me parametra zero, pasi e ka pranuar edhe vetë se do të dëshironte një sfidë të re, në një tjetër kampionat.

Përveç Giroud, Maldini po ndjek me mjaft vëmendje edhe sulmuesin 21-vjeçar të Touluses, Amine Adli, i cili u vlerësua edhe si futbollisti më i mirë i Ligue 2 në Francë, pasi shënoi 8 gola dhe dha 5 asiste. Ai shihet si një nga lojtarët më premtues dhe Touluse e vlerëson rreth 15 milionë euro, megjithatë drejtuesit e Milanit janë gati të paguajnë 10 milionë euro për ta marrë menjëherë në Itali, aty ku do të mund të rritet gradualisht në krah të një eksperti si Zlatan Ibrahimovic.

Top Channel