Cila është kronologjia se si “luftojnë” shtetet me njëra tjetrën për të siguruar vaksinat? Shumë prej vendeve të rajonit janë pjesë e COVAX. Kjo është një aleancë e krijua në prill 2020 nga Organizata Botërore e Shëndetësisë dhe në të marrin pjesë 180 shtete, përfshi të gjitha anëtaret e BE-së.
COVAX ka si qëllim të bashkojë kapacitetet financuese dhe prodhuese për të siguruar një sasi sa më të madhe vaksinash për t’i shpërndarë ato mes vendeve anëtare të aleancës.
Skema COVAX ofron dy lloje kontratash për vendet: marrëveshje paraprake për blerjen e vaksinës dhe marrëveshje opsionale për blerjen e saj. Të dyja marrëveshjet garantojnë qasje në portofolin e vaksinave të COVID-19 me çmimin që do të negociojë COVAX.
I vetmi ndryshim që ka mes tyre është shuma që parapaguhet si garanci për dozat e kërkuara. Nëse një shtet do të zgjedhë marrëveshjen paraprake për sigurimin e vaksinës do të duhet të bëjë një pagesë fillestare prej 1.6 dollarë për dozë dhe një garanci financiare prej 8.95 dollarë për dozë.
Nëse marrim si shembull Shqipërinë, për 570 mijë persona ose 1,140,000 doza, qeveria do të duhet të bënte një pagesë paraprake prej 1.8 milionë dollarësh dhe të linte si garanci financiare 10.2 milionë dollarë. Por Shqipëria ka zgjedhur marrëveshjen opsionale për sigurimin e vaksinës me COVAX.
Shteti duhet të paguajë paraprakisht 3.1 dollarë për dozë dhe një garanci financiare 0.45 dollarë për dozë. Referuar shifrave zyrtare, Shqipëria ka parapaguar 3.53 milionë dollarë dhe një garanci financiare rreth 460 mijë dollarësh, në total 3.99 milionë dollarë.
Kjo zgjedhje jep mundësinë që qeveria të zgjedhë mes vaksinave kandidate që do të sigurohen nga COVAX por nga ana tjetër nëse vendi ynë nuk do të blejë vaksina, atëherë shuma që ka parapaguar nuk rimbursohet.
Emisioni i plotë:
Top Channel
