Të gjendur në mesin e kësaj krize globale, ku lufta për të siguruar vaksinën është kthyer në luftë të “fortësh”, shumë vende e kanë zgjeruar tregun e kërkesës së vaksinës.
Autoriteti rregullator i Medikamenteve dhe i Ushqimit të Hungarisë miratoi pak ditë më parë edhe vaksinën kundër koronavirusit të prodhuar nga Sinopharm e Kinës. Javën e kaluar Hungaria gjithashtu u shkëput nga vendimet e Bashkimit Europian, duke lëshuar një licensë të përkohshme për vaksinën Sputnik V të Rusisë.
BE deklaroi se lidhja e marrëveshjes nga Hungaria jashtë kornizës së përbashkët të bllokut, ishte e papërshtatshme, edhe pse jo ilegale.
Hungaria ka rënë dakord të blejë 5 milionë doza të vaksinës kineze Sinopharm COVID-19. Dozat do të dorëzohen brenda katër muajve dhe do të mundësojnë që Hungaria të vaksinojë 2.5 milionë vetë, rreth një e katërta e popullsisë së saj.
Por a mund të lejohet përdorimi i një produkti nëse nuk është certifikuar më parë nga FDA dhe EMA, dy agjencitë më prestigjoze që japin “ok-in” për përdorimin e medikamenteve?
Ekspertët thonë PO!
Sipas tyre çdo vend ka shkencëtarë, grupe kërkimore dhe agjencitë e veta rregullatore që u jep të drejtën të përzgjedhin mes ofertave që janë në treg.
Nëse rezultatet e tyre kërkimore duken optimale, jo domosdoshmërisht ata duhet të jenë të certifikuara nga FDA apo EMA. Megjithatë ata duhet të parakualifikohen nga Organizata Botërore e Shëndetësisë. Miratimi nga agjenci të tilla si FDA apo Ema, jep një garanci më shumë për produktin.
Pikërisht për këtë arsye ekspertët shqiptarë e konsiderojnë të kotë ngurrimin e qeverisë shqiptare për ti hedhur sytë nga rusja Sputnik 5 apo edhe nga varianti kinez.
Sipas tyre në mjekësi dhe shëndetësi nuk ka kufinj dhe as nacionalizma dhe në këtë kohë krize duhet të shihet me prioritet disponueshmëria e vaksinave.
“Kemi disa aktorë në lojë, pse të mos i shohim të dhënat e të gjithëve. Duhet hulumtuar dhe duhet parë edhe disponueshmëria. Nëse Pfizer na jep një kohë shumë të gjatë disponuesmërie atëherë duhet të shohim një kandidat të dytë. Efektiviteti I sputnik V, sipas raportimeve të tyre, por këtu duhet të kujtoj që edhe të tjerat raportime të tyre i kanë, është 91.4% dhe 100 % në rastet e rënda. Pra është një gjë që ia vlen ta hulumtosh të kesh të dhëna. Duhet të shihen të gjitha kandidatët e mundshëm. Jemi në një krizë, për vendin tonë nuk është problem as nëse nuk është certifikuar nga EMA pasi nuk jemi pjesë e BE-së” u shpeh epidemiologu, Ilir Alimehmeti.
Gjerogjina Kulit Lito, një ndër anëtaret e komitetit të ekspertëve këmbëngul që strategjia e qeverisë për të besuar vetëm vaksinat e miratuara nga EMA apo FDA është ajo e duhura.
“Mund të negociohet me ato kompani që kanë vaksina të miratuara nga Ema apo FDA sepse jo çdo vaksinë që qarkullon mund të pranohen nga kushtet që ne kemi paracaktuar për vaksinat që do të futen në vendin tonë.
Të gjitha vaksinat që janë aprovuar nga EMA apo FDA janë në listën e negociatave të shqipërisë qoftë direkt me kompaninë qoftë nëpërmjet mekanizmit të COVAX”u shpreh Gjeorgjina Kuli Lito, Shefe e Pediatrisë, QSUNT
Emisioni i plotë:
Top Channel
