​Limaj: Parlamenti nuk meriton njerëz që mohojnë të kaluarën e tyre

Duke kërkuar votën e qytetarëve të Gjakovës, Limaj tha se Nisma simbolizon frymën çlirimtare dhe si i tillë do të jehojë në Parlament dhe institucione të tjera në Kosovë.

“Parlamenti nuk meriton njerëz që mohojnë të kaluarën e tyre dhe njerëz që flasin dhe asgjë s’kanë bërë për Kosovë. Mbi të gjitha në Parlamentin e Kosovës duhet të shkohet me përkulje dhe nderim të gjithë historisë që na ka sjellë në shtetin e pavarur e përkushtimin e burrave dhe grave që mbrojnë interesat e Kosovës”, tha ai.

Krahas kësaj, Limaj tha se slogani “Me çlirimtarët” nuk identifikohet me ndonjë individ, por me frymën çlirimtare që nuk është zbehur asnjëherë.

“Kemi zgjedh një kauzë që besojmë se është momenti kritik për të rikthyer të vërtetën tonë, e cila mbi të gjitha është krenare. Një betejë që na solli edhe një herë këtu sot, ne duam të rikthejmë argumentet e lirisë së Kosovës. Pasi po tentohet që këto themele të lirisë të heshtën. Këto janë argumente të lirisë që e gëzojmë sot. Kosova që sot jetojmë nuk ka pikë nga qielli, është rezultat i angazhimeve të baballarëve tanë me dekada dhe shekuj. Kauza jonë ‘Me çlirimtarët’ ka tejkaluar kufijtë partiakë, ne bashkë me ju, krenarë dhe dhimbje fuqishëm do të kthejmë zërin çlirimtar në parlament dhe institucione të tjera”, tha ai.

Në ditën e shtatë të fushatës zgjedhore, kreu i Nismës duke nënkuptuar për kryeministër të PDK-së Enver Hoxhaj, tha se ata që thonë që në Kosovë ka pasur vetëm përpjekje për gjenocid duhet të kërkojnë falje.

“Ne si Nismë iu themi të gjithë tyre se e kanë gabim dhe duhet të kërkojnë falje. Në Kosovë nuk ka pasur përpjekje për gjenocid, por ka pasur gjenocid, shembulli më i mirë është Gjakova”, tha ai.

Gjatë këtij tubimi elektoral u prezantuan edhe kandidatët e Nismës për deputetë nga qyteti i Gjakovës, Deçanit dhe Pejës./KosovaPress/

Top Channel