Mëngjesin e sotëm, Kryeministri Edi Rama e ka nisur me një takim me qytetarët e Sarandës.
Gjatë bashkëbisedimit me qytetarët Rama ka folur rreth investimeve që janë bërë në qytetin bregdetar apo dhe me ato problematika apo ato aspekte që nuk janë prekur.
Ashtu si në Gjirokastër, sërish, Rama i cilëson këto investime që po bëhen, njësoj si kantierin e ndërtimit në Thumanë pas tërmetit të 26 nëntorit.
Gjatë fjalës së tij Rama tha se shëtitorja në këtë qytet pritet të jetë gati për sezonin turistik, ndërsa shton se disa zona ende janë të paprekura dhe pritet të transformohen.
“Sfida jonë është si të rrisim përmbajtjen dhe cilësinë duke i dhënë njerëzve arsye për të qëndruar më shumë. Sot ka ende territore ku progresi nuk është i prekshëm”, tha Rama.
Pjesë nga fjalimi i Ramës:
“Nuk do ja vlente që të linit diçka tjetër që po bënit sot, për të ardhur për folur si për televizor. Duhet të flasim hapur. Nuk dua të them sa shumë kemi bërë për Sarandën, por ta fillojmë aty tek ato gjëra që nuk kemi bërë. Unë dua të përsëris që edhe Saranda, edhe qarku i Vlorës, pavarësisht investimeve të bëra, jo vetëm në aspektin fizik, por edhe në të gjitha aspektet e tjera. Do ju thosha që të parafytyroni, pamjen e kantierit sot në Thumanë, në Fushë-Krujë apo kudo tjetër në perimetrin e zonës së prekur nga tërmeti, ku pamja është krejt e ndryshme nga dita e nesërme e tërmetit i cili ishte një moment tragjik. Janë pastruar rrënojat, është hapur puna për sistemin nëntokësor, janë hapur themelat e ndërtesave por nuk janë ende banesa për të jetuar. Kështu janë të gjitha aspektet e tjera në arsim dhe në shëndetësi.
Besoj që përpara një kantieri ndërtimi, është e qartë se puna vijon, nuk ka kohë për gjumë. Thjesht projektet janë solide, rruga e nisur është solide. Natyrisht është e lehtë ta thuash, shumë e vështirë ta bësh. Arsyeja se përse duhet të jemi në kontakt, është se pse duhet të vazhdojmë dhe të bëhet një balancë mes atyre që janë bërë dhe ato që nuk janë bërë. Shëtitoret nuk janë vetëm transformimi infrastrukture, por është një rritje në aspektin ekonomik. Po të shohësh xhiron e pronarëve që shfrytëzojnë ambientet në Lungomare janë më të larta se çfarë kanë qenë. Nuk dua të zgjatem më tutje”, tha Rama.
Top Channel
