Kosova Të Fundit

Haradinaj paraqet listën e kandidatëve para Këshillit Drejtues

15/01/2021 18:52

Kreu i Aleancës për Ardhmërinë e Kosovës (AAK), Ramush Haradinaj, para Këshillit Drejtues, sot ka paraqitur për miratim listën e kandidatëve për zgjedhjet e 14 shkurtit, duke thënë se Aleanca i jep Kosovës garancën, me njerëzit më të mirë që i ka vendi.

Haradinaj këto zgjedhje i ka quajtur ndryshe për shkak të zhvillime që kanë ndodhur në vend.

Ai ka shprehur solidaritetin për bashkëluftëtarët e tij që janë në Hagë.

“Ne kishim ëndërr lirinë e Kosovës. As sot, pas dy dekadash në liri, dashuria jonë për Kosovën nuk është zbehur aspak. Solidarizohemi me bashkëluftëtarët që sot janë në Hagë dhe iu themi bashkëluftëtarëve kudo që janë, se qëndrojmë të fortë. Jemi këtu për ta, jemi këtu me ta”, është shprehur Haradinaj.

Tutje ai u ka thënë qytetarëve të vendit, që Aleanca është adresë, jo vetëm e qëndrueshme dhe e fortë, por edhe adresë që në procese të rëndësishme janë vendimtarë. Roli i AAK-së, siç thotë Haradinaj, është vendimtar për cilësinë e reformave, fuqinë e Kosovës dhe të institucioneve.

“Programi ynë është i punuar me kujdes, ku në plan të parë është ekonomia e vendit. Aty përfshihet fondi 1-miliardësh për rimëkëmbje, i cili jo vetëm që e ndal rënien ekonomike, por me të vërtetë e bën ndryshimin, për shumë qytetarë të Kosovës të cilët i ka prekur pandemia dhe rënia ekonomike. Me këtë fond, askush nuk do të mbetet i papërfshirë. Ne kemi kërkuar që fondet e Autostradës së Dukagjinit të ridestinohen në urgjencën ekonomike, te qytetarët dhe sipërmarrësit, të paktën edhe këtë vit”, ka shkruar Haradinaj në rrjetin social Facebook.

“Në këto zgjedhje, ne nuk zgjedhim vetëm Kuvendin, qeverinë dhe programin qeverisës. Në këto zgjedhje, ne zgjedhim edhe Presidentin e vendit dhe programin e tij. Kjo është një risi, që Aleanca e ofroi me kohë për vendin. Në fillim nuk u kuptuam. Sot kemi edhe kandidatë tjerë, kemi zonjën Vjosa Osmani nga Vetëvendosje, të cilën e kam ftuar në debat televiziv, që t’iu tregojmë qytetarëve se si do ta forcojmë Kosovën në planin e brendshëm dhe të jashtëm, si do të përballemi me të gjitha ato tema që i kemi përpara, por edhe si do ta anëtarësojmë Kosovën ne NATO. E kush e di më mirë rrugën drejt NATO-s? Kush do ta ruajë më mirë besimin e brezave që sakrifikuan për Kosovën e 17 shkurtit? Ju siguroj që ndoshta në Serbi do të gëzohen nëse nuk do të jem president. Por e kanë gabim, sepse Kosova qëndron në të drejtën e vet, pa i dëmtuar të tjerët. Zgjidhja është respekti i ndërsjellë, e jo qasja që po ndodh tash, kur kemi qeveri dhe presidente në detyrë”, ka vazhduar ai.

Haradinaj ka theksuar se Aleanca ka ditur të punojë me të gjithë udhëheqësit botëror, e të ngrisin çështjen e Kosovës në nivelin më të lartë të vendimmarrësve më të mëdhenj të botës, por jo duke u nënshtruar, sepse Kosova nuk ka nevojë të nënshtrohet para askujt.

Ai gjithashtu ka njoftuar se sot para Këshillit Drejtues, ka paraqitur për miratim listën e kandidatëve për zgjedhjet e 14 shkurtit.

“Sa i përket listës së kandidatëve, Aleanca i jep Kosovës garancën, me njerëzit më të mirë që i ka vendi, në një proces që po vjen, të qeverisjes, të reformave, të ecjes para të vendit, por edhe të ruajtjes së ekuilibrit politik e institucional. Aty përfshihen njerëz me përvojë politike dhe që kanë pasur përgjegjësi institucionale, intelektualë e ekspertë të respektuar në fushat e tyre por edhe njerëz që për herë të parë që garojnë në zgjedhje. Lista përmban doktorë shkencash, mjekë specialistë, profesorë universitarë, juristë, ekonomistë, politologë, inxhinierë, sociologë, arkitektë, veteranë të luftës dhe njerëz me bagazh të madh kombëtar”, ka njoftuar kreu i AAK-së.

Haradinaj ka falënderuar nga zemra për angazhimin, të gjitha strukturat nga nëndegët e deri te Këshilli Drejtues dhe ka shprehur mirë se ardhje për kandidatët e rinj të listës.

Top Channel