Zbardhja e vrasjes së Klodian Rashës/ Avokati i familjes: Hetime shtesë të kamerave të sigurisë

Kjo kërkesë vjen në prag të mbylljes së hetimeve në lidhje me vrasjen e ndodhur në orët e para të 8 dhjetorit të vitit që lamë pas.

“E dorëzova kërkesën për veprime shtesë hetimore për administrim të kamerave të sigurisë  në lagje dhe për të marrë në pyetje dhe një person si dëshmitar, për të saktësuar a njihej apo jo më herët Klodian Rasha me Nevaldo Hajdaraj”, tha  avokati Sakip Lata për TCH.

“Avokati kërkon që të merren kamera shtesë për të bindur familjen nëse Klodian Rasha njihej me vrasësin e tij Nevlado Hajdaraj. Nevaldo ka thënë para gjykatës se ai nuk e njihte duke shprehur edhe pendesë. Madje nuk është apeluar as vendimi i gjykatës së Shkallës së Parë. Pritet që të kryhet edhe kërkesa e avokatit në mënyrë që të jetë i bindur për motivet e vrasjes”, tha gazetarja e Top Channel, Anila Hoxha.

Akoma nuk ka prova shtesë nëse ata njiheshin me njëri-tjetrin dhe do të duhen disa ditë kohë për zbardhjen e këtij detaji të ngjarjes së rëndë.

Hajdaraj ndodhet në paraburgim në  akuzën e “Vrasjes me dashje”.

Top Channel