Situata e përmbytjeve në Shkodër/ Disa akse ende të bllokuara, 960 hektarë nën ujë!

Ndërsa në një prej qyteteve më të goditura, pas monitorimeve periodike në terren, bashkia e Shkodrës njofton se vazhdon të jetë e bllokuar rruga për në Obot për mjetet e ulëta. Niveli i ujit mbi rrugë arrin mbi 80 cm.

Gjithashtu, ujësjellësi Oblika 1 si pasojë e përmbytjeve është jashtë funksionit. Kështu, UKSH ka furnizuar me ujë te pijshëm banore të fshatit Oblikë.

Sipërfaqja e tokës bujqësore e përmbytur vlerësohet në 960 Ha, kryesisht në fshatrat Obot, Muriqan dhe Oblikë.

Për shkak të rritjes së nivelit të ujit është bllokuar segmenti në vendin e quajtur Urrelat që lidh fshatrat Shirq me Darragjat.

Në njoftimin e bashkisë thuhet gjithashtu se vazhdon gërryerja e tokës bujqësore nga lumi Drin në vendin e quajtur Mali i Vukatanit, fshati Ganjollë.

Si pasojë e reshjeve ka shkarje dherash në rrugën Baks –Rrjoll, ku po punohet për pastrimin.

Po ashtu vazhdon gërryerja e tokës bujqësore nga lumi Kir në vendin e quajtur Bardhaj, fshati Bardhaj. Gjithashtu ka rritje të nivelit të ujit nga Liqeni i Shkodrës, në zonën e Livadeve dhe Dobraç.

Janë magazinuar dhe janë gati për shpërndarje tek ndërtesa e konviktit Shkolla Industriale “Arben Broci” 300 pako me ushqime, mbështetje për të siguruar ushqimin për familjet në zonat e përmbytura. Po ashtu, më fshatin Shirq janë magazinuar dhe nesër ne mëngjes fillon shpërndarja sipas listës përfituese të hartuar nga Administratori i Nj. Adminstrative Dajç rreth 28 ton misër donacion. Edhe në fshatin Obot, Muriqan (lagjia Goricë) janë magazinuar dhe nesër në mëngjes fillon shpërndarja sipas listës përfituese të hartuar nga Administratori i Nj. Adminstrative Ana e Malit 8 ton misër donacion.

RAPORTI PER EMERGJENCAT DATE 12.01.2021 ORA 17.30

Top Channel