Policia greke ka sekuestruar në Kapshticë një sasi prej 55 kg kanabis sativa.
Sipas burimeve policore, lënda narkotike ishte ngarkuar në 3 çanta të mëdha, të cilat ishin në një kamion që drejtohej nga një 32-vjeçar, ndërsa në kabinë ndodhej edhe një anëtar tjetër i organizatës, 24 vjeç.
Policia thotë se kishte informacione të sigurta lidhur me aktivitetin e dy të arrestuarve, madje po i gjurmonte prej disa kohësh dhe i ndaloi pak kilometra pasi ishin nisur.
Të dy të arrestuarit janë shtetas shqiptarë. Ata deklaruan se lëndën narkotike e kishin ngarkuar jashtë doganës greke në Kapshticë dhe në vazhdim do ta dorëzonin atë në Athinë.
Në cilësinë e provës materiale u sekuestruan edhe 1220 euro, 6 telefona celularë si dhe kamioni i përdorur për trafikun e lëndës narkotike. Dy të arrestuarit do të dërgohen në gjykatë mëngjesin e së hënës për masë sigurie.
Top Channel
