Analiza/ Çfarë pasojash ka urdhër-arresti kundër Netanyahut? 23/11 08:00
E nominuara për Gjykatën Supreme në Shtetet e Bashkuara, Amy Coney Barret u ka thënë ligjvënësve se ajo do t’i linte anash bindjet e saj personale dhe fetare kur do t’i duhej të vendoste për rastet gjyqësore.
Barret, 48-vjeçare, gjyqtare e Apelit dhe favorite e konservatorëve fetarë, u ka thënë senatorëve se nuk ka agjendë, teksa ka shmangur dhënien e detajeve rreth asaj se si do vendoste për çështje të ndjeshme politike.
“Gjyqarët nuk munden vetëm të zgjohen një ditë dhe të thonë ‘Unë kam agjendë. Më pëlqejnë armët, i urrej armët, më pëlqen aborti, e urrej abortin’ dhe të vazhdojnë sikurse mbretëresha dhe të zbatojnë dëshirat e tyre në botë”, i ka thënë Barret Komitetit të Senatit për Gjyqësi, gjatë ditës së dytë të seancës dëgjimore.
“Nuk është ligji i Amyt”, ka thënë ajo. “Është ligji i popullit amerikan”.
Presidenti amerikan, Donald Trump dhe republikanë tjerë janë duke shtyrë përpara nominimin e saj për të mbushur ulësen e zbrazët në Gjykatën Supreme, pas vdekjes së ikonës liberale, Ruth Bader Ginsburg.
Meqë republikanët kanë shumicën prej 53 ulëseve në Senat, në krahasim me 47 ulëse të demokratëve, këta të fundit mund të bëjnë pak për të ndalur emërimin e Barret në gjykatë.
Udhëheqësi i Komitetit të Senatit për Gjyqësi, Lindsey Graham ka thënë se ky trup do të votojë për nominimin më 15 tetor, përmes së cilit mundësohet një miratim final në Senat në fund të muajit.
Nëse konfirmohet për këtë pozitë të përjetshme, Barret do të rriste shumicën e konservatorëve në gjykatë në 6-3, çka potencialisht mund të ndryshojë balancin ideologjik për dekada.
Demokratët kanë kritikuar nominimin e saj në gkykatë për shkak të datës së afërt të zgjedhjeve presidenciale të 3 nëntorit dhe pandemisë me koronvirus. Ata kanë akuzuar republikanët për hipokrizi, të cilët sipas tyre kanë bllokuar një të nominuar të ish-presidentit amerikan, Barack Obama për një pozitë të tillë më 2016, për shkak të zgjedhjeve.
Në pamundësi të bllokimit të përzgjedhjes së saj, demokratët janë duke sfiduar gjyqtaren Barret për një mori çështjesh, përfshirë abortin, martesat e gjinisë së njëjtë, zgjedhjet dhe kujdesin shëndetësor./REL/
Top Channel
