Jo vetëm vaksinën! Kompania lidere AstraZeneca, edhe trajtim me antitrupa

Firma me seli në Londër, e cila është tashmë një prej liderëve në garën globale të prodhimit të një vaksine, sqaroi se ky testim do të vlerësojë nëse AZD7442, një kombinim i dy antitrupave monoklonalë (mAbs), është i sigurt dhe i tolerueshëm mes 48 personave të cilëve do t’i administrohet e që janë të moshave nga 18 deri në 55 vjeç.

Nëse mjekimi do të rezultojë i sigurt, atëherë AstraZeneca do ta vazhdojë testimin e tij si trajtim parandalues për Covid-19, por edhe si ilaç për pacientët që janë prekur ndërkohë nga sëmundja. Edhe eksperti amerikan Anthony Fauci i ka përshkruar antitrupat monoklonalë si një “mjet” shumë të mirë kundër Covid-19 dhe për të zhvilluar mjekimin e saj të bazuar tek ata, AstraZeneca mori në qershor nga qeveria amerikane 23.7 milionë dollarë.

Ashtu siç është paralajmëruar me kohë, vaksina e saj ndërkohë, e zhvilluar së bashku me Universitetin e Oksfordit, mund të jetë gati deri në fund të këtij viti. Kreu i grupit të vaksinave në Oksford të Britanisë së Madhe, u shpreh optimist për këtë.

“Thjesht është e mundur që, nëse rastet e provave klinike shtohen me shpejtësi, ne mund t’i kemi ato të dhëna këtë vit para rregullatorëve shëndetësorë dhe më pas të kalohet përmes një procesi të vlerësimit të plotë të të dhënave”, tha profesori Pollard i cituar nga CNN. Por ndërkohë duke folur për BBC Radio 4, Pollard paralajmëroi se procesi mund të zgjasë më shumë pasi që varet se sa të dhëna do të jenë në gjendje të mbledhin shkencëtarët.

Top Channel