Danimarka i bashkohet marrëveshjes europiane me AstraZeneca për vaksinën antiCOVID-19

22/08/2020 16:05

Danimarka po i bashkohet një marrëveshjeje të gjerë të BE-së me grupin farmaceutik suedezo-britanik “AstraZeneca” për të siguruar furnizimin e tij me vaksina COVID-19, njoftoi qeveria.

Në mes të qershorit, Gjermania, Franca, Hollanda dhe Italia negociuan një marrëveshje me “AstraZeneca” në emër të Bashkimit Europian, duke garantuar furnizimin e 300 milionë dozave të një vaksine të mundshme kundër koronavirusit të ri .

“Nëse vaksina rezulton të jetë efektive dhe e sigurt, Danimarka do të marrë doza të mjaftueshme për 2,4 milionë danezë për t’u vaksinuar”, theksoi ministri i Shëndetësisë Magnus Heunicke në një konferencë për shtyp, raporton ATSh.

“Objektivi është që të gjithë danezëve t’u propozohet një vaksinë”, shtoi ai, në një vend që numëron 5,8 milionë banorë.

Përveç marrëveshjes së lidhur me AstraZeneca, Bashkimi Europian gjithashtu është lidhur me grupet Sanofi-GSK, Johnson & Johnson dhe CureVac, me qëllim sigurimin e rezervimit të një numri të madh dozash.

Në fund të korrikut, AstraZeneca ishte shprehur se shpresonte të dorëzonte vaksinën që po zhvillon me Universitetin e Oksfordit (Britani e Madhe) deri në fund të vitit.

Në total, Danimarka ka regjistruar 16 525 raste të reja me koronavirus dhe 621 të vdekur.

Top Channel