Ambasada shqiptare në Rumani: Shqipëria s’ndodhet në listën e vendeve me risk

18/08/2020 13:22

Shqipëria nuk ndodhet në listën rumune të vendeve me risk të lartë epidemiologjik, për rrjedhojë, nuk është detyrim karantinimi apo vetizolimit.

Ambasada shqiptare në Rumani publikoi sot vendimin e qeverisë rumune, e cila ka zgjatur Gjendjen së Alertës për një periudhë 30 ditore, duke filluar nga data 16 gusht 2020.

Sipas këtij vendimi, “vijon të mbetet në fuqi ndalimi i hyrjes në territorin e Rumanisë të shtetasve të huaj (të vendeve jashtë BE-së, Zonës Ekonomike të Përbashkët dhe Zvicrës) apo apartitë.

Përjashtohen nga ky ndalim anëtarët e familjes së qytetarëve rumun, e vërtetuar kjo me leje qëndrimi në Rumani në cilësinë e anëtarit të familjes.

Anëtarët e familjes së shtetasve të vendeve të BE-së, Zonës së Përbashkët Ekonomike dhe Zvicrës, të cilët kanë rezidencën në Rumani;

Shtetasit që kanë vizë afatgjatë, Leje Qëndrimi ose një dokument të ngjashëm me Lejen e Qëndrimit të lëshuar nga autoritetet rumune ose një dokument të ngjashëm me këto të lëshuar nga autoritetet e vendeve të tjera, sipas legjislacionit të Bashkimit Evropian;

Personat që udhëtojnë në interes profesional, e vërtetuar kjo përmes vizës, Lejes së Qëndrimit ose një dokumenti të ngjashëm, përkatësisht personel mjekësor, kërkues në fushën e mjekësisë, personel mjekësor për kujdesin geriatrik, si dhe transportuesit dhe kategori të tjera të përfshira në transportin e mallrave të cilët sigurojnë këto transporte të nevojshme;

Personeli i Misioneve Diplomatike, Zyrave Konsullore dhe Organizatave Ndërkombëtare dhe familjarëve të tyre që i shoqërojnë në misionet e përhershme në territorin e Rumanisë, personeli ushtarak ose personeli i cili mund të sigurojë ndihmë humanitare;

Personat në tranzit, përfshirë ata të riatdhesuar si pasojë e dhënies së mbrojtjes konsullore;

Pasagjerët që udhëtojnë për arsye të jashtëzakonshme;

Personat që kanë nevojë për mbrojtje ndërkombëtare ose që kanë arsye të tjera humanitare;

Të huajt dhe apatritët që udhëtojnë për motive studimesh;

Të huajt dhe apatritët që janë punëtorë të kualifikuar, nëse marrja e tyre në punë është e nevojshme për ekonominë, ndërsa aktiviteti nuk mund të shtyhet ose të zhvillohet në distancë.

Të huajt dhe apatritët, punëtorë ndërkufitarë, punëtorë sezonal në bujqësi, personel lundrues detar dhe lumor; anëtarët e delegacioneve sportive ndërkombëtare të cilët marrin pjesë në kompeticione sportive të organizuara në territorin e Rumanisë, si parashikohet në ligjet në fuqi”.

Ambasada bën të ditur se “mbajtja e maskës është e detyrueshme në të gjitha ambientet e brendshme, transportin publik, si dhe në të gjitha ambientet e jashtme ku ka grumbullime si: pazare, tregje, stacione autobusi apo treni, zona ku zhvillohen festime apo pelegrinazhe, shëtitore, si dhe ambientet e jashtme të objekteve turistike”.

Gjithashtu, thekson Ambasada, “momentalisht, Shqipëria nuk ndodhet në listën rumune të vendeve me risk të larte epidemiologjik. Për rrjedhojë, nuk është detyrim karantinimi apo vetizolimi. Kjo listë përditësohet çdo ditë të hënë, në orën 16:00, ora e Rumanisë”./atsh

Top Channel