Të flesh herët apo vonë, zbuloni cilat janë ndikimet për jetëgjatësinë

Njerëzit që Flenë Herët Janë Më Të Shëndetshëm
Sipas studimit, njerëzit që bien për të fjetur herët dhe zgjohen në të gdhirë, janë më të mbrojtur. Studimi tregon se të fjeturit vonë mund të shkaktojë pasoja shëndetësore në organizëm. Studiuesit synonin të zbulonin një lidhje reciproke mes të fjeturit dhe rrezikut të vdekjes së parakohshme dhe sëmundjeve. Njerëzit që flenë herët, zgjohen herët, ushqehen herët dhe mbarojnë punë herët, thanë shkencëtarët. E kundërta vlen për njerëzit që zgjedhin orët e vona për të fjetur e për t’u zgjuar. Këta të fundit raportohen të kenë më shumë probleme shëndetsore.

Ata janë dyfish më të rrezikuar nga çrregullimet psikologjike dhe 30 përqind më të rrezikuar nga sëmundje si diabeti. Për më tepër, njerëzit që flenë vonë janë 25 përqind më të rrezikuar nga problemet nervore, 23 përqind nga problemet me stomakun dhe 22 përqind nga sëmundjet e rrugëve të frymëmarrjes. Sipas studiuesve, njerëzit që rrinë zgjuar natën janë më të prirur ndaj pirjes së duhanit, ushqimeve të shpejta dhe alkolit. Për më tepër, ora biologjike e këtyre të fundit nuk është në përputhje me sjelljen e tyre apo mjedisin.

Sipas të dhënave, studime të mëparshme kanë konfirmuar se njerëzit që punojnë vonë janë më të rrezikuar nga vdekshmëria apo sëmundjet kardiovaskulare. Shkencëtarët sugjerojnë që njerëzit të përshtaten gradualisht me stilin e të fjeturit herët. Ata duhet të ruajnë orare të rregullta të gjumit. Ata që punojnë natën duhet të përqendrohen tek rregullimi i orareve të ngrënies, aktivitetit fizik dhe orëve të gjumit. Me pak përpjekje, njerëzit mund të shmangin probleme të mëtejshme shëndetësore si pasojë e çrregullimeve të tilla./AgroWeb

Top Channel