Rasti Badovci, paditet sekretari i Ministrisë

Grupi për Studime Juridike dhe Politike, Balkan Green Foundation Prishtina, Instituti për Politika Zhvillimore dhe Instituti GAP kanë dorëzuar kallëzim penal ndaj sekretarit Arben Çitaku për siç thuhet veprimet e tij lidhur me rastin e ndërtimeve në hapësirën e Liqenit të Badovcit duke e cilësuar si vendim të kundërligjshëm dhe se ka bërë keqpërdorim të pozitës apo autoritetit zyrtar.

Drejtoresha e Grupit për Studime Juridike dhe Politike Arbëresha Loxha tha se kanë dorëzuar kallëzimin penal ndaj sekretarit të MMPH-së duke pas për bazë se zyra e sekretarit të MMPH-së e ka obliguar Drejtorinë e Urbanizmit të komunës së Prishtinës kundërligjshëm kërkesën për kushtet ndërtimore.

Loxha: Sekretari ka obliguar kundërligjshëm Drejtorinë e Urbanizimit që të procedojë për kushtet ndërtimore

“Së pari ne konsiderojmë se zyra e Sekretarit të Përgjithshëm të MMPH-së kundërligjshëm ka obliguar Drejtorinë e Urbanizmit në Komunën e Prishtinës që të procedojë kërkesën për kushtet ndërtimore duke u thirrur gabimisht në ligjin për ndërtim kjo pasi i njëjti ka obliguar Drejtorinë e Urbanizmit në Komunën e Prishtinës të veprojë duke e anashkaluar vendimin e Qeverisë së Kosovës, i cili parasheh zonën në fjalës si zonë e ndaluar për ndërtim”, tha Loxha.

Loxha tha se është vërejtur tentimi nga Ministria  e Mjedisit për të ndërhyrë në proces dhe se me këtë tentim janë plotësuar elementet për mashtrim.

Loxha: Tentimi I Ministrisë ka plotësuar elementet e veprës penale të mashtrimit

“Vërehet tentim i Ministrisë që të ndërhyjë në proces për të cilin çfarëdo procedure të zbatohej përfundimi do të ishte i njëjtë andaj tendenca e tij për ta treguar të kundërtën si qëllim për ta  çorientuar palën që ka lëshuar kërkesën për lëshimin e kushteve ndërtimore në një zonë të ndaluar për ndërtim paraqet dyshim të bazuar mirë se janë plotësuar elementet e veprës penale të mashtrimit”,  tha Loxha.

Sipas saj  gjatë nënshkrimit për lejimin e këtyre ndërtimeve nuk janë marrë parasysh dispozitat e Udhëzimit Administrativ për kriteret e përcaktimit të zonave të mbrojtura sanitare të burimit të ujit  dhe se Ministria ka rënë në kundërshtim me dispozitat e nenit 4 për përcaktimin e zonave të mbrojtjes për shkak të mbrojtjes së burimit të ujit nga ndotja.

Ardian Ndrecaj nga Grupi për mbrojtjen e Badovcit  tha se në emër të gjithë grupit  i bëjnë thirrje Prokurorisë që këtë çështje ta trajtojë me prioritet të lartë sepse është një çështje shumë jetike për qytetarët e Prishtinës./F.Gashi/

Top Channel