Besimtarët myslimanë kremtojnë sot festën e Fitër Bajramit. Pas Muajit të shenjtë të Ramazanit, ceremonia e festimit të kësaj feste myslimane fillon me faljen e namazit të mëngjesit.
Në Xhaminë e Madhe të Prishtinës, myftiu i Kosovës, Naim Tërnava iu është drejtuar qindra besimtarëve me mesazhin e tij, duke thënë se kjo festë duhet të shfaqë unitet mes njerëzve pa dallim.
“Kjo ditë është ditë e unitetit, prandaj duhet të shfaqim unitetin në familje dhe me njerëzit e shoqërisë sonë. Do të doja që fjalët e mia të dëgjohen si thirrje për të gjithë ne, për popull e qeveri, që të reflektojmë në të mirë dhe për të mirën e atdheut”, tha Naim Tërnava.
Gjatë ditës, ndërkohë, krerët shtetërorë dhe të partive politike kanë vizituar selinë e Bashkësisë Islame të Kosovës, ku edhe kanë përcjellë urimet e tyre.
Fitër Bajrami pason Muajin e shenjtë të Ramazanit, gjatë të cilit sipas besimit Islam agjërohet 30 ditë në shenjë sakrifice dhe përkushtimi ndaj Zotit.
Por, në varësi të shikimit të hënës, festimet e Bajramit do të jenë të vendosura në dy ditë, të martën dhe të mërkurën.
Rajoni i Ballkanit dhe Europa, por edhe Arabia Saudite, Kuvajti, Katari dhe Emiratet e Bashkuara e filluan festimin e Bajramit të martën, ndërsa vende si Egjipti, Siria, Jordania, Indonezia, Japonia, Malajzia, Tajlanda, Pakistani, Australia etj., do ta festojnë të mërkurën.
Tradicionalisht, Bajrami festohet për 3 ditë dhe është një festë zyrtare në të gjitha vendet me shumicë myslimane. Numri i ditëve të pushimit varion nga vendi në vend. Ashtu si Ramazani, Bajrami i Madh fillon me shikimin e parë të hënës, ndaj zakonisht myslimanët duhet të presin deri natën para Bajramit për të verifikuar datën.
Top Channel
