“Dekreti Salvini”, Kisha Katolike hap dyert për emigrantët

Emigrantët në Itali druajnë se mund të mbeten në rrugë, pasi qeveria italiane miratoi atë që njihet si “dekreti Salvini”, pasi ka si autor ministrin e Brendshëm të së djathtës ekstreme, Matteo Salvini.

Ligji i ri heq mbrojtjen humanitare dhe kufizon të drejtën për të kërkuar azil të refugjatëve të prekur nga lufta dhe përndjekja politike.

“Emigrantët nuk mund të lihen në rrugë”, tha Sekretari i Shtetit në Vatikan, kardinali Pietro Parolin. Ai shtoi se pozicioni i Vatikanit është i qartë.

“Një ndjenjë e thellë solidariteti duhet të mbijetojë. Ju nuk mund t’i vendosni njerëzit në një pozitë të tillë. Duhet të fokusoheni gjithnjë te njerëzit dhe te të drejtat e tyre”.

Në anën tjetër, peshkopi i Caltagirones Calogero Peri nuk e frenon gojën dhe thotë se dekreti i ri i qeverisë ka në shënjestër pjesën më vulnerabël të vendit.

“Të braktisësh qentë është një krim, të braktisësh emigrantët është e patolerueshme”, tha ai, duke shtuar se kishte mundur të siguronte rreth 40 shtretër për emigrantët e bllokuar, e se do të hapte më shumë dyert e kishave nëse do të ishte e nevojshme.

Dëbimi i emigrantëve nga Cara di Mineo, qendra më e madhe pritëse në Itali, është shtyrë prej ditësh, por 90 persona nga 1.800 që ndodhen atje do të nxirren jashtë të martën.

Top Channel