Ndonëse me një pasuri të jashtëzakonshme të trashëgimisë kulturore, mjaft objekte dhe monumente të kësaj pasurie joshëse të Shqipërisë për turistët mbeten të paarritshme.
Shkak është mungesa e infrastrukturës, kryesisht asaj rrugore dhe sinjalistikës orientuese. Gjatë një konference të organizuar në Durrës në kuadër të Vitit Evropian të Trashëgimisë Kulturore përfaqësuesja e Delegacionit të BE-së në vendin tonë theksoi nevojën për investime dhe promovim strategjik të trashëgimisë kulturore shqiptare, një aset mjaft i vyer dhe për zhvillimin ekonomik të vendit.
“Besojmë se trashëgimia kulturore shqiptare e veçanërisht ajo e Durrësit ka nevojë për investime dhe promovim strategjik. Shqipëria ka shumë monumente dhe site historike, po e vështirë që turistët ta zbulojnë plotësisht bukurinë e tyre, për shkak të mungesës së infrastrukturës. BE po ndërhyn për të përmirësuar e bërë më të arritshme e të njohur trashëgiminë kulturore në Shkodër, Korçë, Apolloni, Berat, liqenin e Ohrit e vende të tjera”, u shpreh Monika Bylaite.
Këtë sezon turistik edhe Durrësi përjetoi një fluks të madh turistësh të huaj që i dhanë jetë qytetit dhe sollën të ardhura të shumta. Kjo situatë e re ka vënë në lëvizje dhe pushtetin vendor për të realizuar një ide të hershme, atë të parkut arkeologjik ku Amfiteatri Antik qëndron si kurorë e bukur e një trashëgimie mjaft të lashtë e të pasur po ende jo të eksploruar plotësisht nga turistët.
Nevojës për mbështetje nga donatorët dhe qeveria, përfaqësuesja e BE-së iu përgjigj me mundësinë që ka Durrësi po dhe bashkitë e tjera për të aplikuar në thirrjen për propozime që së shpejti do të hapë Bashkimi Evropian në fushën e trashëgimisë kulturore me një grant prej 40 milionë eurosh.
Top Channel
